Në përfundim të mbledhjes së Konferencës Gjyqësore Kombëtare, gjyqtarët kanë dalë me një rezolutë, ku mbështesin reformën në drejtësi duke ofruar edhe kontributin e tyre, por kërkojnë konsensus dhe gjithëpërfshirje.
Gjyqtarët në të gjithë vendin kanë kërkuar njëzëri të mos etiketohen negativisht sa herë që flitet për korrupsionin në sistemin e drejtësisë. Edhe pse pranojnë ekzistencën e të korruptuarve në radhët e tyre, gjyqtarët, të gjithë bashkë kërkojnë që lufta kundër korrupsionit në drejtësi nuk duhet të përdoret për denigrimin e gjithë gjyqtarëve. Në përfundim të mbledhjes së Konferencës Gjyqësore Kombëtare, ky organizëm që përfshin gjyqtarët e gjithë vendit, doli me një rezolutë të miratuar, ku mbështet reformën në drejtësi dhe ofron të gjitha kapacitetet që ka për kryerjen e kësaj reforme. E mbledhur për të zgjedhur një përfaqësues në Këshillin Drejtues të Shkollës së Magjistraturës, Këshilli nuk la pa diskutuar as çështjen më të debatuar të kohëve të fundit, reformën në drejtësi. Në rezolutën e miratuar pas mbledhjes së djeshme, Konferenca thotë se ka ndjekur me vëmendje debatet e kohëve të fundit lidhur me nevojën e kryerjes së reformave gjithëpërfshirëse të pushtetit gjyqësor. Konferenca përshëndet tryezën organizuar nga Presidenti i Republikës dhe ministri i Drejtësisë dhe përkrah çdo iniciativë që synon realisht forcimin e pavarësisë së sistemit të drejtësisë. “Në këtë kuadër, KGJK vlerëson se, jo vetëm institucionet kushtetuese dhe të gjitha forcat politike, por edhe të gjithë operatorët e sistemit të drejtësisë duhet të angazhohen seriozisht për të kryer një reformë sa më të dobishme”, thuhet në rezolutën e miratuar nga gjyqtarët. Në këtë rezolutë gjyqtarët sugjerojnë konsensus dhe gjithëpërfshirje në miratimin e nismave të rëndësishme për sistemin gjyqësor. “Miratimi me konsensus dhe gjithëpërfshirje i nismave është i rëndësishëm dhe i vlefshëm për sistemin gjyqësor, për shkak se në të do të ndërthuren idetë, eksperiencat, zgjidhjet, çka do të garantojë në këtë mënyrë një reformë cilësore, të qëndrueshme në kohë dhe të pranueshme nga të gjithë. KGJK shpreh gatishmërinë e saj të plotë për të marrë pjesë aktive në këtë proces të rëndësishëm dhe jetik për vendin”, thuhet në deklaratë. Gjyqtarët thonë se janë të gatshëm që brenda hapësirave kushtetuese e ligjore të shfrytëzojnë të gjitha kapacitetet dhe aftësitë e tyre për një luftë pa kompromis kundër korrupsionit, duke mbështetur çdo masë konkrete në këtë drejtim. Por gjyqtarët kërkojnë që lufta kundër korrupsionit të mos shërbejë për të denigruar padrejtësisht të gjithë komunitetin e gjyqtarëve në përgjithësi. “Konferenca Gjyqësore shpreh shqetësimin e saj se etiketimet dhe tonet negative në drejtim të të gjithë gjyqtarëve pa dallim, jo vetëm cenojnë funksionimin normal të sistemit gjyqësor, por komprometojnë rëndë misionin e dhënies së drejtësisë dhe pavarësinë e këtij sistemi”, thonë gjyqtarët e vendit, të cilët po ashtu, të gjithë bashkë denoncojnë me forcë çdo fenomen korruptiv në radhët e gjyqësorit. “Megjithatë, ritheksojmë në këtë aspekt se KGJK denoncon me forcë dhe në mënyrë të prerë çdo fenomen korruptiv në radhët e gjyqësorit, si dhe inkurajon organet ligjzbatuese që të ndërmarrin masa konkrete në luftën kundër këtij fenomeni. Ato duhet të ushtrojnë përgjegjësitë e tyre për të identifikuar individët të cilët kryejnë veprime që bien ndesh me ushtrimin e detyrës, duke i vënë ata para përgjegjësisë ligjore”, thuhet në rezolutë. Më tej gjyqtarët kërkojnë me vendosmëri që të angazhohen të gjithë për të luftuar pa kompromis korrupsionin, një fenomen të cilin, ata e konsiderojnë të rrezikshëm dhe shumë të dëmshëm për shtetin dhe shoqërinë. Në rezolutën e tyre, gjyqtarët e Shqipërisë kërkojnë nga strukturat përkatëse shtetërore marrjen e masave të mëtejshme që synojnë përmirësimin e infrastrukturës dhe garantimin e kushteve të përshtatshme të punës, rritjen e sigurisë në gjykata, dhe trajtim financiar dinjitoz.
