Mjetet e Policisë së Shtetit do të kenë pajisje , ngjyra dhe shenja të veçanta. Ky vendim është miratuar ditën e sotme nga Këshilli i Ministrave dhe konsiston në ndryshimin e ngjyrës, targës dhe logos në mjetet e policisë.
Ky vendim hyn në fuqi pas botimit në “Fletoren zyrtare”.
Më poshtë vendimi i plotë
VE N DIM PËR NJË NDRYSHIM NË VENDIMIN NR.538, DATË 1.5.2008, TË KËSHILLIT TË MINISTRAVE, “PËR PËRCAKTIMIN E PAJISJEVE TË VEÇANTA, TË NGJYRAVE DHE SHENJAVE PËR MJETET E POLICISË SË SHTETIT”
Në mbështetje të nenit 100 të Kushtetutës dhe pikës 2, të nenit 5, të ligjit nr.9749, datë 4.6.2007, “Për Policinë e Shtetit”, të ndryshuar, me propozimin e ministrit të Punëve të Brendshme, Këshilli i Ministrave
V E N D O S I:
Fjalia e fundit e pikës 2, të vendimit nr.538, datë 1.5.2008, të Këshillit të Ministrave, ndryshohet si më poshtë vijon: “…Ngjyra, targa dhe logoja në mjetet e uniformuara të Policisë së Shtetit janë të njëjta, me përjashtim të mjeteve të sektorit të forcës së posaçme “Shqiponja” dhe Sigurisë së Shoqërimit, të cilat do të kenë ngjyrë dhe dizenjo sipas lidhjes nr.1, bashkëlidhur këtij vendimi, e cila është pjesë përbërëse e tij”.
Ky vendim hyn në fuqi pas botimit në “Fletoren zyrtare”. K R Y E M I N I S T R I EDI RAMA
