Seanca, e cila nisi rreth orës 17:40, përfundoi me rrëzimin e dekreteve të kthyera nga Presidenti Nishani për 5 ligje, të cilat u diskutuan dhe u rrëzuan në mbledhjen e parë të Komisionit të Ligjeve dhe atij të Sigurisë
Kuvendi i Shqipërisë çeli pasditen e sotme sesionin e ri parlamentar, me praninë në sallë të deputetëve të maxhorancës dhe atyre të PDIU-së, dhe PDK-së. Seanca, e cila nisi rreth orës 17:40, përfundoi me rrëzimin e dekreteve të kthyera nga Presidenti Nishani për 5 ligje, të cilat u diskutuan dhe u rrëzuan në mbledhjen e parë të Komisionit të Ligjeve dhe atij të Sigurisë.
Kuvendi hodhi poshtë Dekretin për Shkollën e Magjistraturës (me 77 vota pro), atë për Policinë e Shtetit (me 79 vota pro), Dekretin për Reformën Administrativo-Territoriale (me 81 vota pro), Dekretin për Gjykatën Administrative (me 73 vota pro) dhe atë për ligjin e KLD (me 78 vota pro)
Në fjalën e mbajtur para votimit kryeministri Edi Rama theksoi se presidenti Bujar Nishani me dekretet e tij ka goditur tre prioritet kombëtare. Ai i bëri sërish thirrje opozitës të jetë pjesë e punimeve, ndërsa the se mazhoranca nuk do të presë.
“Ata mendojnë që mungojnë me arsye, por unë besoj se arsyet e paraqitura për mungesën janë arsye që konfirmojnë mungesën e plotë të ekuilibrit të opozitës me detyrat ndaj publikut dhe ndaj zgjedhësve të vet. Sidoqoftë në këtë pikë nuk jemi në vazhdën e foltores që bënte kryeministri që lëshonin ç’tu vinte për goje për opozitën në mungesë. Vetëm se një gjë është e sigurt se përpjekjet për t’i mbyllur gojën opozitës jo vetëm që nuk ka, por ka një dëshmi shumë të qartë për t’i krijuar opozitës për të folur përtej çdo caku që i cakton rregullorja. Megjithatë ne jemi më shumë të vullnetshëm që ta dëgjojmë opozitën deri në fund, packa rregullores, por nuk mund të presim opozitën. Ndaj përshëndes ata që filluan punën para punës së zakonshme. Jepet mesazhi i qartë se ne nuk kemi kohe të presim, se Shqipëria nuk ka kohë të presë. Ne e respektojmë opozitën në zgjedhjen e saj, por bebisiterin e opozitës nuk e bëjmë se opozita sot nuk është një bebe që qahet nga uria, por një plakë që qahet nga mbingopja”, tha Rama.
Në vijim të fjalës së tij, Rama përmendi një shembull që sipas tij ndiqej nga deputetët gjermanë.
“Ashtu sikundër më ka bërë përshtypje që nuk e dija deri dje që në Gjermani qenka një ligj i pashkruar, i shkruar në heshtje që zbatohej nga të gjithë, por i pashkruar asnjëherë; që opozita kurrë nuk thotë asnjë fjalë të keqe në veshët e të huajve. Ndërkohë që më ka ndodhur që kam takuar të huaj që kanë dëgjuar me veshët e tyre opozitën dhe më kanë thënë se pse vallë ata flasin si me vete për gjëra që i shohin vetëm ata”, tha Rama.
Më herët, kryetari i Partisë Demokratike, Lulzim Basha theksoi se opozita vijon bojkotin ndaj punimeve të Kuvendit pasi siç thekson ai, së djathtës i është mohuar fjala dhe se parlamenti nuk është më tempulli i demokracisë.
