Drejtore e Departamentit të Administratës Publike thotë se së shpejti hapen konkurset edhe për vendet e tjera të mbetura nga 257 pozicione të lira në administratë
Drejtore e Departamentit të Adminsiratës Publike deklaroi sot hapjen e procedurave për shpalljen e vendeve të lira të punës në shërbimin civil. Ajo tha se deri më sot, janë shpallur 113 vende të lira nga 257 pozicione të lira pune, në nivel specialisti në të gjithë administratën shtetërore. Bëhet fjalë për një numër të gjerë institucionesh, jo vetëm ministri, por edhe institucione të varësisë. “Është hera e parë që në administratën shtetërore nuk kemi më konkurse për pozicion pune, por kemi konkurse për një grup pozicionesh, që do të thotë konkurse masive të grupuara për pozicione të ngjashme. Është hera e parë që në legjislacionin e ri, fituesve të këtyre konkurseve u jepet mundësia të zgjedhin ku duan të punojnë dhe jo siç ka qenë praktikë e mëparshme, ku titullarët e institucioneve zgjidhnin nga lista e fituesve. Në javët në vazhdim do të vijojmë edhe me shpalljen e vendeve të tjera të lira në shërbimin civil. Procesi për këto konkurse do të kalojë në dy faza. Faza e parë është ajo e verifikimit të dokumentacionit dhe e kritereve të përgjithshme. Faza e dytë është ajo e verifikimit të aftësive të kandidatëve. E cila do të pasohet nga një testim me shkrim, një testim me gojë, një testim aftësive profesionale të çdo kandidati. Këto testime do të kryhen nga Komitete Përzgjedhëse, të cilat janë përsëri një risi e ligjit, në kuptim që janë Komitete Përzgjedhëse që kanë një mandat 2-vjeçar, janë Komitete të cilat përzgjidhen për grup pozicionesh dhe që në përbërje të tyre kanë përfaqësues nga institucionet, kanë përfaqësues ekspertë të fushave dhe përfaqësues nga Departamenti i Administratës Publike”, tha Albana Koçiu.
Ajo theksoi se aplikimet bëhen vetëm online dhe se faqja zyrtare e Internetit të DAP është dizenjuar enkas, për t’i ardhur në ndihmë të gjithë aplikantëve. Koçiu tha se nëpërmjet aplikimit online shmangen burokracitë e tepërta, gabimet e mundshme që ndodhin si pasojë e çuarjes së dokumenteve në postë e marrjes së tyre nga posta, por ndërkohë kandidatët kanë edhe mundësinë të marrin gjithë informacion e nevojshëm në lidhje me aplikimin e tyre. Ajo premtoi se departamenti që drejton është ianagzhuar për të kryer një proces transparent e brenda parimeve të ligjit për nëpunësin civil. “ “Angazhimi i Departamentit të Administratës Publike është zbatimi me rigorozitet i parimeve të ligjit të shërbimit civil. Që do të thotë i parimeve të shanseve të barabarta, i mosdiskriminimit, i meritokracisë, nëpërmjet një procesi përzgjedhës transparent dhe të drejtë. I gjithë ky proces, siç e theksova edhe më herët, ka ardhur si rezultat i mbështetjes dhe bashkëpunimit edhe me partnerët tanë strategjikë, duke hartuar një kuadër ligjor, i cili është afër standardeve të Bashkimit Evropian dhe që garanton cilësinë në administratën publike. Sa më sipër, unë do të ftoja të gjithë të interesuarit që të bëhen pjesë e këtyre aplikimeve, duke sjellë në vëmendje që të tregoni kujdes me afatet e aplikimit, procedurat dhe kriteret e veçanta për çdo pozicion pune”, tha Koçiu.
