Zëdhënësja e baroneshës Eshton, Maja Kocijançiç, ka thënë se kushdo që vjen në krye të Qeverisë së Kosovës duhet të ulet në tryezën e bisedimeve me Serbinë, për të vazhduar procesin e negociatave për normalizimin e marrëdhënieve në mes të dy vendeve.
Kocijançiç i ka thënë Radio Dukagjinit se qeveria e re, pos vazhdimit të dialogut, duhet të implementojë pikë për pikë marrëveshjen e arritur vitin e kaluar nga Thaçi e Daçiq.
“Dialogu duhet të vazhdojë. Ne presim që puna të vazhdojë edhe për implementimin e marrëveshjes së arritur në Bruskel, me 19 prill”, ka thënë ajo.
Zëdhënësja e baroneshës Eshton ka theksuar se është e domosdoshme që qeveria e re të krijohet sa më parë, në mënyrë që sa më parë të merret me problemet me të cilat përballet Kosova.
“Ashtu siç e kemi thënë në deklaratën tonë zyrtare, pas zgjedhjeve të 8 qershorit në Kosovë, ne presim që sa më shpejt të krijohet qeveria, e cila duhet të përballet me sfidat që gjenden para Kosovës, siç janë reforma ekonomike dhe përpjekjet për sundim të ligjit, duke mos lënë anash vazhdimin e dialogut dhe implementimin e marrëveshjes së 19 prillit”, ka theksuar ajo.
Partitë opozitare, përveç Vetëvendosjes, e kanë mbështetur dialogun Kosovë-Serbi, në mënyrë direkte apo indirekte, duke votuar për ratifikimin e marrëveshjes së 19 Prillit në Kuvend.
Tani Vetëvendosja ka shtruar kushte për përkrahjen e marrëveshjes së bllokut opozitar për krijimin e qeverisë së re të Kosovës. Njëri ndër tri kushtet e kësaj partie është ndërprerja e dialogut me Serbinë. Ndërkaq, partnerët e koalicionit LDK-AAK-NISMA janë shprehur për një qasje të re ndaj dialogut dhe për rishikim të marrëveshjeve të deritashme me Serbinë
