47% e shqiptarëve me arsim të lartë ka emigruar gjatë një periudhe gati 10 vjeçare, e kjo sipas ekspertëve të institutit të statistikave do të çojë në varfërimin e ekonomisë së vendit.
“U largova sepse fitova bursë në Paris. Tani jetoj në Luksenburg. Kam mall për familjen por më mban këtu cilësia më e mirë e jetesës. Ju them miqve të mi që janë aty lum si ju keni diell dhe me përgjigjen: hajde jeto këtu me diellin por pa të ardhura ekonomike”, u shpreh Zamira Pode-emigrante.
Ekspertët Sokrat Palushi dhe Elma Cali në studimin “Diaspora e Shqipërisë në shifra” nxorën në pah se Shqipëria ka nivelin më të lartë në rajon të emigrimit të njerëzve të arsimuar dhe studentëve jashtë vendit. Për vitin akademik 2019-2020 18, 181 të rinj u larguan për studime jashtë vendit, ndërkohë fenomeni i largimit të trurit nga Shqipëria është vit pas viti në rritje.
“Jam zgjedhur në grupin e 30 fituesve nga 600 studentë që aplikuan për degën e kontabilitet financë në Luksemburg”, shprehet një studente.
Emigracioni ka ndarë edhe familjet shqiptare. Të moshuarit po jetojnë vetëm, pasi fëmijët po sakrifikojnë jo vetëm për arsimim më të mirë por edhe për një punë të sigurtë në të ardhmen për të ndihmuar familjen.
