“Turqia ka shkelur të drejtën ndërkombëtare dhe Konventën mbi Ligjin e Detit në Egje dhe në Mesdheun Lindor. Ka bërë 400 mbikalime mbi territorin grek! Mevlüt, nuk ka asnjë ligj që lejon fluturimin mbi territorin grek. Gënjeshtrat kanë mbaruar i dashur Mevlüt”, kështu i është shprehur ministri i jashtëm grek, Nikos Dendias homologut të tij turk Mevlüt Tsavousoglou, të enjten pasdite, nga Ankaraja ku patën një konferencë të përbashkët.
Edhe pse shpresat ishin që ky takim të jepte sinjale të një përmirësimi të marrëdhënieve, ai përfundoi në akuza të forta nga të dyja palët. Dendias shpjegoi për Kathimerini se “çështja me të cilën përballemi me Turqinë është se nuk ekziston asnjë emërues i përbashkët lidhur me kornizën e zgjidhjes së mosmarrëveshjeve tona”.
Ministri i Jashtëm turk, Mevlüt Çavuşolulu dhe diplomatët turq që morën pjesë në negociatat me delegacionin grek ngritën të gjitha çështjet mbi të cilat Ankaraja kërkon të imponojë pikëpamjet e saj si: pretendimi se ishujt nuk kanë një raft kontinental dhe zonat detare në Egje duhet të jenë Greqia dhe brigjet e Azisë së Vogël, pozicioni turk thotë se është paradoksale që Greqia të ketë hapësirë ajrore prej 10 milje detare dhe ujëra territoriale prej 6 milje dhe pikëpamja që Traktati i Lozanës parashikon çmilitarizimin e ishujve, shkruajnë mediet greke.
Dy anëtaret e NATO-s janë përplasur ashpër me njëri tjetrin për një sërë çështjesh, por konflikti mbi interesat territorial në Mesdhe i çoi verën e kaluar në prag konflikt ushtarak.
“Fakti që kemi qëndrime të ndryshme për një sërë çështjesh, duke nisur nga burimet e energjisë e deri tek Qiproja e ndarë etnikisht nuk mund të fshihet”, tha shefi i diplomacisë greke, i cili megjithatë nënkuptoi se dritarja për negociata mbetet e hapur.
Ai theksoi se Athina vazhdon t`i mëshojë idesë se shënimi i zonës së vet ekonomike dhe shtrirjes kontinentale me Turqinë në Detin Egje si dhe në lindje të Mesdheut, duhet të bëhet në bazë të ligjit ndërkombëtar. Ai i zbuti tonet me Cavusoglou duke e ftuar t`i vazhdojnë bisedimet e tyre në Athinë, çka shihet si mundësi për t`i hapur rrugën një takimi mes vetë kryeministrit grek Kyriakos Mitsotakis dhe presidentit turk Recep Tayyip Erdogan.
