Ish-kryeministri i Kosovës Albin Kurti u ka “dalë” në krah Presidentit Hashim Thaçi dhe ish-kryeparlamentarit Kadri Veseli, pas aktakuzave të ngritura nga Gjykata e Hagës për krime kundër njerëzimit gjatë luftës.
“Nuk e di a është ashtu, por, e di që lufta e UCK’së, është luftë e drejtë është luftë kundër një agresori dhe okupatori I cili kishte kryer gjenocid në vendin tonë dhe se luftëtarët e lirisë veteranët e invalidët e UCK’së edhe politikisht edhe historikisht janë në të drejtën e tyre”, ka thënë Kurti për mediat nga selia e Vetëvendosjes.
Lideri i Vetëvendosjes ka thënë se ngritja e aktakuzës për presidentin e dëmton reputacionin e Kosovës në arenën ndërkombëtare.
“S’do mend se kjo ngritje e aktakuzës e dëmton reputacionin e Kosovës në arenën ndërkombëtare dhe një takim i tillë nuk do të mund të ishte I dobishëm në rrethanat e tjera të krijuara. Unë besoj në pafajësinë e UCK’së, dhe mendoj që Kosova është dashur qysh moti ta ketë gjyqësinë e vetë të paanshme që të hetojë gjykojë të gjitha krimet e luftës dhe të paqes dhe mbi të gjitha ato që janë shkaktuar nga Serbia në Kosovë, dmth VV ka kontribuar në dy momente të rëndësishme”, tha Kurti.
“Shteti i së drejtës nuk ka zëvendësim, unë gjithnjë kam thënë se nuk mund të na e bëjë drejtësinë dikush prej jashtë, apo prej anash, por ne në shtetin tonë duhet ta ndërtojmë dhe ta bëjmë atë me institucionet tona të pavarura. Kam shprehur bindjen time se ka pasur një projekt për coptimin e Kosovës, për korrigjim të kufijve, ky projekt pat dështuar se si ide nuk ka vdekur, nuk do të duhej të riaktualizohet si projekt”, përmbylli ai.
