Përdhunimi i minorenes nga roja i shkollës ka ngritur në këmbë shumë qytetarë, të cilët “pushtuan” rrugët e Tiranës. Në formën e një marshimi, në sheshin Skënderbej dhe në Kodrat e Liqenit kanë marshuar sot nëna me fëmijë, artistë, gazetarë, politikane dhe përfaqësues të shoqërisë civile për t’i thënë stop dhunës ndaj të miturve.
Protesta me moton “Për Fëmijërinë e Vjedhur” ka për qëllim reagimin e shtetit dhe forcimin e dënimit për abuzuesit. Mes protestuesve ishte sot edhe këngëtarja e njohur Aurela Gaçe, e cila tha se kishte dalë të protestonte për shumë vajza të dhunuara që heshtin nga frika. Ajo kërkoi ashpërsimin e masave dhe dënimin e abuzuesve.
“Jam në protestë për shumë vajza, për shumë djem që mbase nuk kanë folur kurrë që janë dhunuar. Jam këtu për t’i kërkuar shtetit tim që të vendosë një ligj të fortë. Duhet ta di që nëse flas, jam i mbrojtur. Nëse gratë, vajzat e dhunuara kanë frikë të flasin është edhe fakti që nuk dinë ku të flasin.
Një njeri të sëmurë është pak ta mbyllësh në burg për 2 vjet. Është për të ardhur keq që fajësojmë viktimën. Si mund të thuash donte vetë?? Kjo është absurde. Jam këtu për të thënë që jam një qytetare e këtij vendi. Nuk po them që cdo prind duhet të kalojë në vetëgjyqësi.
Jam këtu që shteti të vendosë ligje më të forta, këta njerëz duhet të dënohen rëndë që të kenë frikë, të mendohen mirë këta njerëz para se të ngacmonin fëmijët”,- tha ajo.
