Arben Manaj
Një 21-vjeçar me origjinë nga Shqipëria ka kryer një akt të lartë trimërie dhe heroizmi në Londër, duke shpëtuar nga kthetrat e vdekjes një 20-vjeçare angleze, e cila kishte rënë në lumë dhe ishte duke u mbytur.
I përshkruar me një trup muskuloz, njësoj si akori britanik Daniel Craig në fimat e James Bondit, Genci Gestila, i cili ka jetuar në Greqi ku ka shërbyer edhe në ushtrinë greke për 9 muaj në Spartë dhe ishullin e Samosit, tha për “Daily Mail” se “ishte stërvitur për situata të tilla, duke u zhytur nëpër liqene të ngrira”.
“Unë nuk mendova sesi do të ndikonte uji i ftohtë te mua, por thjesht doja të shpëtoja vajzën”, tha shqiptari.
Një amerikan dëshmitar okular, që vizonte Londrën i ardhur nga Nju Jorku, 52-vjeçari Phil Hardy tha se “ishte një momet dramatik dhe djaloshi 21-vjeçar tregoi një trimëri të pashembullt”.
Policët e ardhur në vendngjarje e cilësuan shqiptarin Genci Gestila “hero”. Pasi iu dha një filxhan çaji i ngrohtë nga pronari i klubit, shqiptari me rrobat e bëra qull mori autobusin për të shkuar në shtëpi, jo larg nga vendi i ngjarjes, duke u shprehur se “shpresonte që vajza të mos kishte më probleme”.
Anglezja ndodhet në spital jashtë rrezikut. Kjo është hera e dytë brenda disa muajsh, që shqiptarët bëhen protagonistë për të shpëtuar jetë njerëzore në Londër, duke u pasqyruar në median britanike, siç ishte rasti i disa shqiptarëve që u përleshën me terroristët dukë shpëtuar me dhjetëra viktima të mundshme gjatë sulmit terrorist të disa muajve më parë në qendër të Londrës.
