Një pëllëmbë tokë për një ndërtesë tetë kateshe mbi dhe. Kështu duket banesa në lagjen “Arbëria 3” mbi hekurudhën e trenit, në të cilën është duke investuar NTP “Butrinti”. Megjithëkëtë, ky mund të jetë problem vetëm për banorët që do të jetojnë në të, sepse banesa rrezikon në të ardhmen dy –tri shtëpi që ndodhën sipër saj, shkruan lajmi.net.
Sado që janë vendosur disa ‘pilot’ të betonit, dheu është gërryer aq shumë saqë njëra nga shtëpitë mund të rrezikohet seriozisht. Pronarë të shtëpisë sipër saj është familja Mehmeti të cilët e kanë lëshuar tokën për ndërtim, ndërsa investitori, Nesuf Zhegrova në anën tjetër të rrugës ka edhe disa ndërtesa tjera, por ato janë në rrafsh.
Mbi shtëpinë e familjes Mehmti, ndodhen edhe shtëpitë e Ylber Miftarit dhe e vëllait të tij.
Miftrai nuk dëshiroi të flas nëse ndihet i rrezikuar nga gërmimi i shumtë i dheut, por ndihet i mashtruar nga investitori lidhur më ndërtimin e objektit.
“Në këto dy shtëpitë këtu, banojmë unë dhe vëllai im. Në shtëpinë tjetër, më duket që janë pronarët që e kanë lëshuar tokën për objektin. Në fillim ndërtuesi e ka marrë pëlqimin tonë. Neve na ishte prezantuar një plan që ndërtesa do të jetë P+5, tash po del më e madhe. Nuk jemi ankuar në komunë ose diku, se nuk kemi ndonjë fuqi. Edhe nuk ke çka ankohesh, këtu shkon qysh shkon, në tanë anët e ke kështu”, thotë Miftari.
Kompania NTP “Butrinti” nuk është përgjigjur në kërkesën e lajmi.net, nëse banorëve u ishte prezantuar plani P+5 dhe nëse banorët sipër saj janë të sigurt.
Në ballë të ndërtesës është një pllakatë e cila tregon se hartimin e projektit kryesor për ndërtesën në fjalë e ka bërë kompania “Green Door”, pronar i të cilës është Driton Tefiku. Por, në lejen e ndërtimit që e ka parë lajmi.net, thuhet se planin e ka bërë kompania “ALEngineering” që ka për pronarë Vjollca Lokaj dhe se Driton Tefiku ka qenë i angazhuar si projektues për fazën e arkitekturës.
Driton Tefiku është shok i ngushtë me drejtorin e Urbanizmit të Komunës së Prishtinës, Liburn Aliu dhe ish drejtorin e Financave të Prishtinës, Visar Berisha, i cili ka qenë ortak me kryetarin Shpend Ahmeti në një biznes.
Lajmi.net ditëve në vijim do të raportojë për përfshirjen e Driton Tefikut në disa leje të ndërtimit në Komunës e Prishtinës, në dy vitet e fundit.
Ndonëse, ndërtesa nuk ka thuajse fare hapësirë të tokës poshtë saj, gjë që dalja është menjëherë në asfaltin e lagjes, nuk dihet nëse Plani rregullues i mëhershëm i lagjes “Arbëria” parashihte ndërtim në atë parcelë. Ndryshimi i Planit rregullues për këtë lagje është bërë në vitin 2015 nga kompania “Urban plus”, që për pronarë e ka Ilir Gjinollin, i cili është mik i kryetarit të Prishtinës, Shpend Ahmeti. Ndryshimi i planit ishte votuar në asamblenë e Prishtinës.
Në rrugën “Ekrem Rexha” në këtë lagje, në tetor të vitit 2013, pati rrëshqitur dheu. Ndërsa, Qani Kadiri, ekspert i gjeologjisë, profesor në Fakultetin e Ndërtimtarisë, me urdhër të Prokurorisë së shtetit, pati dalë në vendin e ngjarjes me detyrë që të vlerësojë rrezikshmërinë. Kadiri kishte vlerësuar se problemi më i madh ishte mosplanifikimi me kohë i ndërtimit të lagjes dhe e pati arsyetuar rrëshqitjen e dheut me mos vendosjen si duhet të disa ‘pilotëve’ të betonit. Tash, Qani Kadri është pjesëmarrës në këtë ndërtim. Ai e ka bërë elaboratin gjeomekanik dhe sigurimin e terrenit me ‘pilota’ dhe ka arsyetuar qe rreth objektit ka stabilitet dhe qëndrueshmëri pas aplikimit te fondimit me ‘pilota’.
“I LEJOHET pronareve Bahrue, Selatin, Sefedin, Ramiz, Avni dhe Zeqir Mehmeti nga Prishtina dhe investitori NTP “Butrinti” me përfaqësues Nasuf Zhegrova nga Prishtina, ndërtimi i ndërtesës shumebanesore me afarizëm, me etazhitet 3B+P+8, ne kuadër te parcelës kadastrale nr. 6189-7, të evidentuar ne Certifikatën e njësisë kadastrale P-71914059-06189-7 ZK Prishtine, konkretisht ne nenbllokun “C 1.3.1” te bllokut “C1.3”, të tërësisë Urbane “Veranda” te ndryshim dhe plotësim te Planit Rregullues “Arbëria 3”, thuhet në lëshimin e kësaj leje të ndërtimit.
Sipas projektit kryesor të prezantuar, sipërfaqja e tërësishme e ndërtesës, e lejuar për ndërtim, është 6636.50m2, prej tyre 1740.60 m2 janë sipërfaqe nën kuotën O.OO-nëntokë dhe 4895.90 m2 janë sipërfaqe mbi kuotën O,OO-mbi tokë. Përdhes me sipërfaqen bazë prej 521.20 m2 është e destinuar për afarizëm dhe hapësira te përbashkëta, nëntoka është e zhvilluar në tri nivele të bodrumeve, kll dy prej tyre me nga 580.7m2 te destinuara për garazhim për 35 automjete dhe kthina teknike dhe nje nivel i bodrumit me 579.2m2 për afarizëm, katet I-VIII janë planifikuar me destinim banim.
