Por subjekti politik serb në Kuvendin e Kosovës, Lista Serbe e cila bënë pjesë në koalicionin qeverisës nuk ka dhënë qëndrim konkret nëse e përkrah apo jo çështjen e votimit të Demarkacionit.
Kontaktuar , kreu i listës Serbe, Slavko Simiq, ka deklaruar se lidhur me çështjen e demarkacionit nuk kanë biseduar asnjëherë me partnerët e koalicionit.
“Ne vazhdimisht i mbajmë kontaktet me partnerët me tanë, Kadri Veselin dhe Isa Mustafën. Gjithmonë kërkojmë dhe gjejmë ide konstruktive për t’i tejkaluar disa probleme dhe vështirësi me të cilat ballafaqohen qytetarët tanë në Kosovë kur është fjala për demarkacionin absolutisht nuk kemi pasur asnjë bisede konkrete për këtë temë”, ka thënë Simiq.
Ai ka deklaruar se rreth çështjes së demarkacionit me Malin e Zi duhet të jenë partitë politike kosovarë ato që duhet t’i gjejnë zgjidhje problemit.
“…rreth kësaj çështjeje partitë politike shqiptare që janë pjesë e Kuvendit së pari të kenë konsensus politik sepse kjo është temë dy vitet e fundit është aktuale së cilës po iu kundërvihen ashpër partitë politike”, ka deklaruar tutje kreu i Listës Serbe.
Por pyetur për votën e këtij subjekti politik karshi çështjes së Demarkacionit, Simiq nuk ka dhënë qëndrim konkret.
“Për ne është me rëndësi që të shohim se a ekzsiton një konsensus politik. Kjo temë nuk na ngarkon shumë politikisht. Jemi kushtuar problemeve shumë më të mëdha me të cilat po ballafaqohen qytetarët tanë. Nuk jemi të ngarkuar fare me këtë temë”, ka thënë tutje ai.
Ndërkohë që kryeministri Mustafa, javë më parë në një intervistë dhënë mediave ka deklaruar se me kthimin e Listës Serbe në Kuvëndin e Kosovës janë krijuar mundësitë për dërgimin e demarkacionit për votim në Kuvend.
“Kështu që nëse stabilizohet ardhja e Listës Serbe në Kuvend ne duhet të procedojmë me këtë çështje, sepse numri formal sigurohet. Por, presim që deputetët ta marrin përgjegjësinë që ta votojnë dhe ta kapërcejmë këtë çështje”, pati deklaruar Mustafa.
Megjithatë, sfida kryesore për koalicionin mbetet sigurimi i 80 votave për ratifikimin e kësaj marrëveshjeje
Ratifikimi i marrëveshjes, ishte tërhequr nga votimi në Kuvendin e Kosovës më 1 shtator të vitit të kaluar, pas tensionimit të gjendjes së sigurisë dhe mungesës së votave për ratifikim.
