Ai këto komente i bëri me rastin e nisjes së punimeve në ndërtimin e rrugës Dragash-Shishtavec.
Duke folur për çështjen e demarkacionit dhe procedimit të kësaj çështjeje në Kuvend, Mustafa tha se kjo do të ndodhë kur të jetë e sigurt se demarkacioni do të kalojë.
Mirëpo dje, këshilltari i tij për media, Faton Abdullahu tha se demarkacioni shkon në Kuvend javën që po vjen, duke ngritur kështu edhe më shumë mjegull rreth votave të LDK-së në Kuvend, si dhe paqartësi në koordinimin brenda ekzekutivit, shkruan lajmi.net.
Një deklaratë e tillë e kryeministrit është edhe kundër zotimit të kryetarit të Kuvendit, Kadri Veseli, i cili më 21 prill, të premten, tha se demarkacioni do të shkojë në Kuvend këtë javë që jemi.
Megjithatë, përveç që ky zotim i Veselit nuk u përfill nga Mustafa, shefi i qeverisë nuk përfilli as thirrjen e administratës amerikane që demarkacioni brenda javës të futet në votim.
Në një komunikatë për media të Kuvendit të Kosovës, të datës 21 prill, thuhej se kryetari i Kuvendit të Republikës së Kosovës, Kadri Veseli, ka zhvilluar një bisedë telefonike me zëvendës ndihmës sekretarin e SHBA-së, Hoyt Brian Yee.
“Në këtë drejtim, ata janë pajtuar që demarkacioni i kufirit me Malin e Zi të procedohet nga Qeveria për miratim në Kuvend javën tjetër. Diplomati amerikan Hoyt Yee e përgëzoi Veselin për lidershipin e treguar në vendimmarrje, me theks të veçantë e vlerësoi partneritetin që FSK të shndërrohet në ushtri në koordinim me Shtetet e Bashkuara të Amerikës”, thuhej në njoftimin për media nga Kuvendi.
