Në një prononcim për Insajderin, Daka ka thënë se me Zhushin ka një shoqëri të vjetër dhe se për më tepër ajo nuk është shpallur e fajshme për akuzat që e rëndojnë.
“Unë Ferdije Zhushin e kam shoqe që 50 vjet, e njoh prej fëmijërisë. Kemi qenë në klasë bashkë, jemi rritur bashkë. Jemi shoqëru, e vazhdojmë ende shoqërinë”, tha Daka.
Daka ka deklaruar se nuk e konsideroj jo etike këtë paraqitje në publik, madje ajo thotë se nuk mund t`i ndërpres lidhjet shoqërore edhe familjare që i ka me të.
“Po mendoj që është etike. Nëse ajo ka lëndë, e ka lëndën në Gjykatën Themelore të Prishtinës, edhe unë nuk kam të bëjë asgjë me Gjykatën Themelore të Prishtinës. Unë bile kam pasë rast kur m`ka ra një kërkesë e saj për mbrojtje të ligjshmërisë, më ka rënë mua. Po unë kam kërkuar përjashtimin edhe jam përjashtuar, edhe nuk jam vendosë në atë lëndë”, tha Daka.
Daka, tha se fotografimi i saj është bërë qëllimshëm për shkak të ankesës në rastin e zgjedhjes së Kryetarit të Gjykatës së Supremes.
“Janë tuj ba linqim të njerëzve qëllimisht. Kjo është e qëllimshme e qitne, mu për shkak të rastit që është këto ditë, që jam e përfshirë në zgjedhjen e Kryetarit të Gjykatës Supreme. Këtë dikush qëllimisht është duke e ba. Si me më pas përcjellë, se tash e pash unë, gjithë ato fotografi”, tha Daka.
Kodi i Etikës dhe Sjelljes Profesionale për Gjykatës ndalon shoqërimin me persona të cilët ia cenojnë dinjitetin e gjykatësit në ushtrimin e funksionit të tij, qofshin ata familjarë apo shoqëri.
Në këtë rast, Valdete Daka është shoqëruar në publik me Ferdije Zhushin, e cila akuzohet në rastin e aktakuzës për ryshfet në Agjencinë e Akreditimit.
Kodi i Gjykatësve, thekson se gjyqtari me sjelljet e tij në gjykatë dhe jashtë gjykatës ruan dhe avancon besimin e publikut dhe palëve në paanshmërinë e tij dhe gjyqësorit në përgjithësi.
Gjykatësit sipas Kodit, janë bartës të funksionit të rëndësishëm publik dhe i nënshtrohen vazhdimisht mbikëqyrjes nga publiku dhe sipas vullnetit të lirë pranojnë kufizimet që imponohen nga funksioni që e ushtrojnë.
Kodi i Etikës thekson se gjyqtari sillet në atë mënyrë që afirmon besimin e publikut dhe integritetin e sistemit gjyqësor dhe se gjyqtari nuk lejon që relacionet e tij familjare, shoqërore apo tjera të ndikojnë në mënyrë të padinjitetshme në ushtrimin e funksionit të tij.
Madje, Kodi thekson se gjyqtari në asnjë rrethanë nuk do ta shfrytëzojë pozitën e tij gjyqësore, as t’i lejoje të tjerët që ta shfrytëzojnë pozitën e tij për interesa private.
Në këtë rast, Valdete Daka, është shoqëruar me të akuzuarën Ferdije Zhushi, e cila akuzohet së bashku me Basri e Armend Mujën si dhe Naim Brahën.
Ky rast, përveçse është në proces gjyqësor, i njëjti mund të jetë subjekt i shqyrtimit në Gjykatën Supreme, ku Daka është gjykatëse.
Së fundi një prokuror, i cili ishte takuar me të akuzuar në Ferizaj dhe ishte publikuar, ka dhënë dorëheqje nga pozita e prokurorit.
