Në kërkesën drejtuar Scotland Yard, nga ana e Ministrisë së Drejtësisë dhe Zyrës së Kryeprokurorit të Shtetit, thuhet se në pjesë të caktuara të opinionit publik, janë shfaqur dyshime në lidhje me integritetin dhe paanshmërinë e procesit të hetimit.
“Me qëllim të adresimit të këtyre shqetësimeve dhe për të siguruar besimin dhe kredibilitetin e publikut për këtë hetim, Ministria e Drejtësisë, së bashku me Kryeprokurorin e Shtetit, ftojnë dhe mirëpresin policinë metropolitane (Scotland Yard) që në mënyrë të ndarë të kryej një hetim në lidhje me këtë çështje”, theksohet në kërkesë.
Lëvizja Vetëvendosje dhe përfaqësuesit e familjes Dehari, kanë ngritur dyshime në raportin e ekspertizës së kryer në Prishtinë, kurse kërkesën drejtuar ekspertëve nga Britania, familja Dehari e kishte cilësuar si një spektakël medial.
Avokati Tomë Gashi, përfaqësues i familjes Dehari, ka thënë për Radion Evropa e Lirë se kërkesa e Ministrisë së Drejtësisë është e vonuar. Siç thotë ai, Ministria ka pritur që të dalin rezultate dhe të mbyllet rasti, pastaj ka kërkuar hetim ndërkombëtar.
Sipas Gashit, për një kërkesë të tillë, ministrja e Drejtësisë, Dhurata Hoxha, është dashur ta njoftojë në mënyrë zyrtare edhe familjen e Astrit Deharit.
“Është për tu analizuar shkresa apo letra e ministres së Drejtësisë, nëse na japin mundësi dhe pastaj do të sqarohemi në emër të familjes apo si përfaqësues juridik i familjes”, ka thënë Gashi.
“Tani duket se Ministria e Drejtësisë nuk i beson as vetë deklaratave skandaloze të Kryeprokurorit, se kinse kemi të bëjmë më vetëvrasje. Për ta sqaruar rastin ajo ka deklaruar se do të kërkojë bashkëpunim nga Britania e Madhe”, ka deklaruar Gashi.
Astrit Dehari, që sipas Tomë Gashit, është vrarë nga pushteti.
“Nuk është që nuk kanë dije juridike se në cilën fazë është dashur të angazhohet bashkësia ndërkombëtare, mos të lënë mëdyshje lidhur më vdekjen e dhunshme të Astrit Deharit në burgun e Prizrenit. Por, këta qëllimisht njëherë kanë lejuar që prokurori të mbyll rastin, pastaj të kërkojnë hetime pasi rasti është mbyllur”, ka theksuar ai.
Çështja Dehari është bërë temë debati publik dhe politik. Në takimin e Komisionit Parlamentar për Legjislacion, Mandate dhe Imunitete ka pasur përplasje në mes anëtarëve të partive në pushtet dhe opozitës.
Deputetja Albulena Haxhiu, nga radhët e Lëvizjes Vetëvendosje, e cila është edhe kryetare e këtij Komisioni, ka thënë se Ministria e Drejtësisë në rend të parë është dashur të konsultohet me familjarët e Deharit, duke thënë se shteti është përgjegjës për vdekjen e tij.
“A keni parë se si zgjedhen prokurorët dhe gjyqtarët. Me telefon të Adem Grabocit dhe Kadri Veselit zgjidhen. Kriminelët e kanë kapur shtetin. Më vjen keq t’ju them se po bëheni shërbëtor të krimit dhe jo deputetë të Kuvendit të Kosovës”, ka thënë Haxhiu.
Ndërkohë, pas deklaratave të Haxhiut kanë reaguar anëtarët e Partisë Demokratike të Kosovës në këtë Komision.
Kurse deputeti i Lidhjes Demokratike të Kosovës, Armend Zemaj e ka fajësuar edhe Vetëvendosjen për vdekjen e Astrit Deharit.
“E keni shty njeriun me vra veten e tash bëni çka të doni”, është shprehur Zemaj.
Sipas raportit të autopsisë rezulton se vdekja e të ndjerit Astrit Dehari ka ardhur si pasojë e asfiksisë mekanike (mbyllja ose bllokimi i rrugëve të sipërme të frymëmarrjes), si pasojë e dëmtimeve të vetë shkaktuara, të cilat kanë qenë të shoqëruara me gjakderdhje të jashtme.
Por, Lëvizja Vetëvendosje, përmes një komunikate për media, e ka quajtur raportin e autopsisë jokredibil.
