Një set mundësish përfshin edhe veprimin e drejtpërdrejtë ushtarak amerikan, si për shembull sulmet ajrore ndaj bazave ushtarake siriane, depove të municioneve apo radarëve dhe bazave antiajrore, tha njëri prej zyrtarëve në kushtet e anonimatit mbi diskutimet e brendshme të pritshme.
Ai shtoi gjithashtu se, rreziku kryesor i një veprimi të tillë është fakti që forcat ruse dhe siriane janë shpeshherë të alternuara, duke shtuar mundësinë e një konfrontimi të drejtpërdrejtë me Rusinë, gjë që Obama ka dashur gjithnjë ta evitojë.
Zyrtarët amerikanë deklarojnë më tej se e shohin si të pagjasë, që Obama të urdhërojë sulme ajrore amerikane ndaj objektivave të qeverisë siriane, si dhe theksuan se ai mund të mos marrë asnjë vendim në takimin e planifikuar të Këshillit Kombëtar të Sigurisë.
Alternativa tjetër, sipas zyrtarëve, është të lejohen aleatët të furnizojnë rebelët e verifikuar nga Shtetet e Bashkuara me armatime më të sofistikuara, por pa përfshirë raketa antiajrore nga ato që lëshohen edhe mbi shpatulla, gjë për të cilat Uashingtoni frikësohet se mund të përdoren më pas edhe ndaj avionëve të Perëndimit.
Mbi këtë raport ekskluziv të “Reuters”, Shtëpia e Bardhë ka refuzuar të komentojë. Por takimi i planifikuar i kësaj të premteje është i fundit i një serie të gjatë debatesh të brendshme, në lidhje me atë se çfarë duhet bërë për t’i dhënë fund luftës civile thuajse 6-vjeçare në Siri, që ka lënë të vrarë të paktën 300 mijë njerëz dhe ka detyruar të zhvendosen thuajse gjysmën e popullsisë së vendit.
Qëllimi më i fundit i veprimeve të reja, nëse ndërmerren, do të jetë forcimi i rebelëve të moderuar, në mënyrë që të përballojnë atë që shihet gjerësisht si rënia e paevitueshme e zonës lindore të Aleppos të kontrolluar prej rebelëve, në duart e forcave besnike të Bashar al-Assadit të mbështetura nga aleatët rusë dhe iranianë.
