Policia e Vlorës ka zbuluar autorët e vjedhjes së bankës së nivelit të dytë në Vlorë më 11 korrik dhe ka arrestuar njerin prej tyre, ndërsa ka shpallur tjetrin në kërkim. Hetimet vazhdojnë për zbulimin e të tjerë personave të përfshirë.
Policia e Vlorës njoftoi se “gjatë hetimeve intensive në lidhje me ngjarjen, ka bërë identifikimin, kapjen dhe arrestimin e shtetasit Kostandinos Shakaj, 37 vjeç, lindur në fshatin Kotë, banues në fshatin Vajzë, Vlorë dhe ka shpallur në kërkim shtetasin G.Gj., 36 vjeç, banues në Vlorë. Tashmë po punohet për kapjen e tij.
Arrestimi i Kostandinos Shakaj u krye pasi në bashkëpunim me G.Gj, më datë 10.07.2016, kanë vjedhur automjetin tip “Benz-Mercedes-2500” me targë të huaj 435AJL06, mjet të cilin e kanë përdorur për të kryer vjedhjen e bankës së nivelit të dytë “BKT” Vlorë.
Shakaj është person me precedent penalë të mëparshëm, i shpallur në kërkim për “vjedhje me dhunë, kryer në bashkëpunim”, vepër penale për të cilën i është caktuar masa e sigurisë “arrest në burg”.
Policia vijon hetimet për zbulimin e autorëve të tjerë të implikuar në lidhje me ngjarjen.
