Nga sot, për çdo blerje përmes internetit qytetarët do të paguajnë në shtet një taksë nga 20 deri në 35 për qind të vlerës së mallit. Vendimi i shumëdebatuar i qeverisë, i cili ul kufirin e taksimit të blerjeve online në 22 euro është botuar zyrtarisht në fletoren zyrtare, çka nënkupton hyrjen automatikisht në fuqi.
Vendimi klasifikon si mallra me vlerë të papërfillshme, dhe që rrjedhimisht nuk i nënshtrohen taksimit mallrat e blera nëpërmjet porosisë nga interneti, vlera e të cilave nuk kalon vlerën ekuivalente në lekë të shumës 22 euro. Ndërsa për dhurata që vijnë nga jashtë vendimi përcakton si kufi të përjashtuar taksimi vlerën 45 euro.
Deri më sot, kufiri i taksueshëm për blerjet nga interneti ka qenë vlera 143 euro. Pra çdo blerje, vlera e të cilave ishte deri në këtë limit nuk taksohej. Me uljen e kufirit me gati 7 herë qeveria praktikisht takson çdo blerje nga jashtë përmes internetit, pasi nën këtë vlerë nuk mund të blesh dot as një artikull individual.
Blerjet nga interneti u shndërruan në një instrument mjaft të preferuar për konsumatorët shqiptarë, veçanërisht gjatë viteve të fundit për shkak të mundësive më të mëdha të zgjedhjeve që ofron tregu ndërkombëtar, por edhe çmimeve konkurruese. Në shumë raste të njëjtët artikuj në tregun shqiptar mund t’i gjesh me çmime disa herë më të parat nga ato që tregtohen në tregjet e huaja.
Qeveria pretendon se përmes kësaj mase e ul kufirin e taksueshëm në të njëjtin nivel si Bashkimi Europian. Por duhet theksuar se kjo masë në Bashkimin Europian zbatohet vetëm kur malli blihen nga vendet ekstrakomunitare. Ndërsa blerjet brenda vendeve të BE janë të përjashtuara.
Ulja e kufirit të taksueshëm pritet të dekurajojë ndjeshëm blerjet online, jo vetëm sepse rrit kostot e tyre, por edhe sepse rëndon procedurat burokratike. Për çdo blerje nga jashtë me vlerë mbi 22 euro, që duhet të zhdoganohet për konsumatorin fillon një kalvar i gjatë procedurash burokratike nga plotësimi i deklaratës doganore dhe deri tek pagesa në bankë. vetëm pasi të ketë përfunduar këto procedura qytetarët mund të tërhiqni mallin nga posta.
