Parlamenti ka miratuar me 139 vota pro në parim reformën në drejtësi, më e rëndësishmja e këtij 10-vjeçari. Pasditen e sotme është prezantuar një draft i ri, propozim i ambasadorëve Donald Lu dhe Romana Vlahutin. Mazhoranca dhe opozita janë shprehur pro këtij propozimi të ri.
Në seancën që rinisi rreth orës 23:20 është i pranishëm trupi diplomatik i akredituar në vendin tonë. Ambasadorët Donald Lu dhe Romana Vlahutin janë fokusuar disa herë nga kamerat dhe megjithëse lodhja e këtyre ditëve intensive dukej qartë në fytyrat e tyre, dy diplomatët dukeshin të qetë.
Ndërkohë kryeministri Edi Rama ka mbajtur një fjalim brenda natyrës së tij në seancën maratonë të parlamentit. Ai tha se nëse do të shkruante një libër për gjithë çfarë ka ndodhur, askush nuk do e besonte. Rama ka falënderuar disa herë ndërkombëtarët dhe partnerët e Shqipërisë, ndërsa u ndal të shpjegonte se çfarë do të bëjë kjo reformë.
“Nëse do të vendosja një ditë të shkruaja një libër për historinë e këtij procesi dhe të rreshtoja ç’më kanë parë sytë dhe veshët, në shqip dhe anglisht jam i bindur se nuk do gjendje një lexues i vetëm që t’i besonte. Por nuk besoj se do e shkruaj ndonjëherë sepse do sëkëlldiseshin disa përfaqësues të popullit në këtë sallë. Pa këta miq që po na ndjekin nga ballkonet e parlamentit, kjo ditë e sotme për votimin konsensual nuk do kishte ardhur kurrë, para se të shuhej fara e një politike të mbrapshtë me 7 koka. Një politikë që e bëri drejtësinë shesh. Reforma do të nxjerrë tymin e zi nga pallati i padrejtësisë. Falënderim dhe një ndjesë për çdo mik ndërkombëtar të Shqipërisë.
Jam i bindur se shqiptarët që ndjekin fundin e kësaj odiseje të gjatë, që nuk besonin se reforma në drejtësi do të bëhej, do t’u jenë gjithnjë mirënjohës miqve tanë të mëdhenj.
Vota e sotme do të çelë tiparin e një revolucioni të shumëpritur në drejtësi.
Ky proces nuk do të ketë asnjë hap më të lehtë se sa ky që hodhëm sot. Gjykatësit dhe prokurorët e korruptuar do t’i fshijë nga sistemi i drejtësisë fshesa e vettingut”, deklaroi Rama.
