Dhe kështu, një muaj vere, hapi një debat dhe mbylli shumë rrugë, një muaj bëri që të binë pothuajse të gjitha shpresat. Sot, si asnjëherë më parë, PD me shumë gjasa e ka përgjigjen në majë të gjuhës, “Jo” propozimit të ndërkombëtarëve për kompromis për miratimin e reformës në drejtësi.
Lulzim Basha tha se nuk kishte rrëzuar propozimin e fundit amerikan, por se kishte pranuar 95% të atij propozimi.
“Nuk pranojmë rolin vendimmarrës të “Operacionit Ndërkombëtar të Monitorimit” në procesin e vetingut”-tha Basha. Sipas tij kjo është vetëm 5% e propozimit të ndërkombëtarëve.
Me sa duket, Basha po kërkon me ngulm pjesëmarrje dhe vendimmarrje politike në procesin e rivlerësimit të të gjithë gjykatësve dhe prokurorëve aktualë në sistem.
Nuk dihen arsyet që e shtyjnë Lulzim Bashën drejt këtij vendimi, ku kërkon me ngulm kapjen politike të procesit të vetingut dhe akuzon ndërkombëtarët për kapjen e procesit të vetingut.
Në draftin e ndryshimeve në Kushtetutë thuhet qartë se Operacioni Ndërkombëtar i Monitorimit drejtohet nga Komisioni Evropian në Bruksel.
Pjesë e këtij Operacioni së fundi u bënë edhe amerikanët dhe kjo u konfirmua nga nënsekretaria ameriakane e shtetit, Viktoria Nuland.
Mirëpo, pyetja e madhe konsiston në faktin se çfarë e shtyn PD-në të bëjë hapa pas. Kryesisht pas konflikteve historike të krijuara në vitet 96-97 si dhe në vitet 1998-2000, ku marrëdhëniet me amerikanët pothuajse kishin ngrirë plotësisht.
Nga se ka frikë PD? A është kjo pyetja që po shqetëson tashmë demokratët dhe njerëzit e thjesht të këtij vendi, që më shumë se askusht tjetër, besuan se mrekullia edhe mund të ndodhë.
