Policia shqiptare: U ngrit në fshatin Akërni në Vlorë dhe iku në drejtim të Italisë. Shoqërohen tre persona. Në Puglia u ndoq nga dy avionë ushtarakë, por humbi gjurmët. Tre precedentët e avionëve me drogë
Një avion i vogël që dyshohet se trafikonte drogë u ka shpëtuar ndjekjes ajrore nga dy avionë ushtarakë italianë. Policia shqiptare, nëpërmjet një njoftimi për shtyp, thotë se avioni u ngrit në fshatin Akërni të Vlorës dhe lëvizi drejt Italisë. Në Puglia u ndoq nga avionë ushtarakë, por humbi gjurmët. Burime nga Policia e Shtetit pohojnë se në orët e para të mëngjesit të 20 marsit, është marrë informacion se në zonën e fushave të fshatit Akërni në Vlorë, po lëvizte në hapësirën ajrore një avion i vogël, mbi të cilin ka dyshime se mund të transportonte lëndë narkotike. “Policia e Vlorës, e Kufirit dhe shërbimet e Delta Forcë nisën një operacion për të identifikuar avionin e për ta ndalur atë, ndërsa u kërkua edhe bashkëpunimi i homologëve italianë”, thotë Policia e Shtetit. Sipas saj, pavarësisht informacionit të marrë në rrugë operative, policia nuk mundi të gjejë vendndodhjen e avionit pasi ai u largua nga hapësira ajrore shqiptare.
Shoqërimet dhe media italiane
Mësohet se për rastin në fjalë janë shoqëruar tre persona me inicialet N.M, A.M dhe K.M me dyshimin se janë të lidhur në këtë veprimtari kriminale. Atyre u është sekuestruar edhe një automjet fuoristradë dhe një furgon në pronësi të tyre. Burime nga Policia e Shtetit thanë se tre personat janë shoqëruar në qytetin e Vlorës dhe dyshohet se pikërisht me këto makina kanë çuar lëndë narkotike në fshatin Akërni për ta transportuar më tej me avion. “Policia e Shtetit po bashkëpunon edhe me Prokurorinë për Krime të Rënda Tiranë dhe ka bërë regjistrimin e procedimit penal për veprën penale ‘Trafikim të lëndëve narkotike’ të kryer në bashkëpunim. Veprimtaria hetimore është në vijim edhe nga homologët e policisë italiane për zbulimin e autorëve të implikuar në këtë veprimtari kriminale”, thuhet në një njoftim zyrtar të Policisë së Shtetit. Ndërkohë, lajmin për avionin e dyshuar se transportonte drogë e konfirmojnë edhe mediat italiane. Mësohet se autoritetet italiane kanë qenë në gjendje alarmi pas informacioneve se mund të zbarkonte një avion droge. “Ditën e diel, një aeroplan me përmasa të vogla është futur në territorin e Pulias. Trupa ajrore italiane kanë ndjekur mjetin fluturues të vogël me një helikë” deri sa ai ka dalë nga territori ajror i Italisë”, shkruan Corriere Della Sera. Sipas saj, menjëherë pasi avioni ka shkelur në hapësirën ajrore italiane, më konkretisht në qiellin e Puglias, në drejtim të tij janë nisur disa avionë gjuajtës të ushtrisë italiane, të cilët e kanë shoqëruar deri në dalje të hapësirës ajrore. Sipas raportimeve të mediave italiane, avioni me një helikë mund të jetë ngritur nga Greqia ose Shqipëria, ndërsa mungojnë të dhëna të tjera konkrete rreth tij. Edhe dyshimet e autoriteteve italiane, janë se ai mund të jetë përdorur nga trafikantët e drogës, të cilët kanë tentuar të trafikojnë një ngarkesë gjigante, të cilën siç duket e prisnin persona të tjerë në terren.
Precedentët e avionëve të drogës
Në shtator të vitit të kaluar, një avion i vogël është kapur në Itali, pas operacionit “krahu i hekurt”. Rezultuan katër persona të implikuar në trafikun e drogës me avion ultra të lehtë, model “Dynamic” dhe grupit i është sekuestruar 80 kilogramë kanabis, e dërguar në Itali, pas nisjes nga një vend i paidentifikuar në Shqipëri. Të arrestuarit rezultojnë të jenë 2 shtetas shqiptarë Maksim Llanaj dhe Fitor Alliaj i njohur me pseudonimin Vito, si dhe dy italianët Pasquale Dambrossio piloti i avionit dhe Rosario Camprisi. Sipas hetimeve rezulton se në datën 31 gusht, shtetasi italian, Pasquale D’Ambrosio, i cili pilotonte avionin e tij ultra të lehtë, model “Dynamic”, i modifikuar posaçërisht për të lehtësuar transportimin e lëndës narkotike, u ul në Leçe. Nga përgjimet rezulton se në datën 1 shtator ai do të nisej për në Shqipëri, duhet të mbërrinte në një zonë të papërcaktuar në territorin shqiptar dhe të transportonte 120 kg marijuanë. Ndërkohë, krahas këtij rasti, vitet e fundit janë zbuluar edhe dy precedentë të tjerë të trafikut të drogës me avion nga Shqipëria në Itali. Majin e vitit 2014, piloti italian, Giorgio Rifomatto, 56 vjeç, u kap bashkë me Saimir Bajramin, 35 vjeç, të cilit iu gjet drogë dhe 27 mijë euro. Avioni pësoi një defekt teknik dhe ka bërë një ulje emergjente në Divjakë. Policia gjeti disa çanta me kanabis pranë vendit me rërë ku ndaloi avioni. Nga kontrolli u gjetën në një makinë, 460 kilogramë hashash. Nga hetimet rezulton se Bajrami ka hyrë në Shqipëri më 7 maj 2014 dhe një ditë pas tij, në datën 08.05.2014, ka hyrë i pandehuri Giorgio Riformato me avionin e tij tip “PIPER”. Rasti më flagrant ishte ai i 26 gushtit të vitit 2015, kur u arrestuan 14 persona që dërgonin kanabis me avion sportiv përtej Adriatikut. Me lidhje farefisnore mes tyre, trafikantët nga Vlora kishin mundur të krijonin një rrjet të mirorganizuar kriminal. Policia sekuestroi në Brindisi një avion sportiv “Aereoprakt A22”, model “Ultra Legera” me 120 kg drogë. Avioni i vogël, i drejtuar nga shtetasi Vilson Lamaj, është nisur nga Italia, duke u ulur në orën 07:02, në një zonë pa shumë lëvizje në afërsi të fshatit Xhelilaj, pranë Sevasterit në Vlorë, ku edhe ka ngarkuar një sasi prej 120 kg marijuanë. Në Shqipëri u ndaluan Neko Bruhamaj, Fatos Bruhamaj, Fadil Shahaj, Igli Shahaj, Sokol Lamaj si edhe efektivi i Policisë së Vlorës, Vladimir Zanaj, shef i sektorit të burimeve njerëzore. Në Itali janë arrestuar Elizer Ahmetaj, Xhesian Ahmetaj, Arshi Ahmetaj, Artjon Lamaj, Kleo Lamaj, Bukurosh Këshilli, Virjon Imeraj, si edhe Vilson Lamaj. Mariglen Mullai shqip
