Gjykata e Tiranës ka pranuar kërkesën e Prokurorisë dhe ka caktuar masën e sigurimit “arrest në burg” për shtetasin Eduart Budini, i dyshuar për vjedhjen me dhunë të taksistit H. H., ngjarje e ndodhur në 26. 11. 2015. I dyshuari u arrestuar në datën 17. 03. 2016. Sipas dosjes, mësohet se ngjarja ka ndodhur në muajin nëntor të vitit 2015 dhe se për katër muaj ajo është mbajtur e fshehur.
Prokuroria Tirane, mbi bazën e materialit kallëzues të shtetasit H. H., të referuar nga Komisariati Nr. 6 Tiranë, ka filluar hetimet për veprën penale “Vjedhja me dhunë” në tentativë, të parashikuar nga neni 139-22 i Kodit Penal.
Në datën 16. 03. 2016, është regjistruar emri i shtetasit Eduart Budini, si autor i dyshuar për kryerjen e veprës penale sa më sipër.
Nga studimi i të dhënave të dokumentuara nga Policia Gjyqësore dhe verifikimeve te bëra nga prokurori, rezulton se:
Në datën 09. 11. 2015, rreth orës 12:00, në rrugën “ 3 Dëshmorët” në Yzberisht, një person i paidentifikuar ka tentuar t’i vjedhë taksistit H. H., nën kërcënimin e një arme tip pistoletë, paratë e xhiros ditore.
Rezulton se kontaktin me të dëmtuarin ai e ka pasur pranë vendqëndrimit të zakonshëm të taksive tek Parku “Rinia”, ku aty i ka kërkuar një shërbim taksie deri në Yzberisht.
Në lidhje me autorin e veprës penale, shtetasi H. H. ka paraqitur disa karakteristika fizike dhe të dhëna të tjera të fiksuara prej tij.
Gjithashtu ai ka dorëzuar një CD me pamje filmike të kohës së ngjarjes me regjistrime të kryera nga një kamerë sigurie, e instaluar në kabinën e autoveturës së tij.
Nga këqyrja e pamjeve filmike të ngjarjes së ndodhur në datën 09.11.2015, shfaqet autori i veprës penale një person në moshë të re, karakteristikat fizike të tij, si dhe veprimet e kryera për realizimin e vjedhjes deri në largimin nga mjeti i të dëmtuarit,
Në datën 16. 03. 2016, këto pamje filmike janë shfaqur në median audiovizive dhe ndjekës të saj kanë bërë komente të ndryshme për ngjarjen, ku një prej tyre paraqet identitetin e autorit të dyshuar të veprës penale dhe konkretisht paraqet këto të dhëna: “emër, mbiemër- Eduart Budini” dhe “vendbanimi- Këlcyrë”.
Pas identifikimit dhe shoqërimit të shtetasit Eduart Budini në ambientet e Komisariatit të Policisë nr. 6 Tiranë, si dhe ballafaqimit të tij me pamjet filmike, ai pohon se është personi që shfaqet në video, si dhe pranon plotësisht autorësinë e vjedhjes me dhunë.
Në lidhje me të është urdhëruar ndalimi, që është ekzekutuar nga Policia Gjyqësore në datë 17. 03. 2016.
Gjatë kontrollit të banesës dhe atij personal të ushtruar ndaj tij, është sekuestruar arma e shërbimit, pistoleta tip TT model 54, gjashtë fishekët në krehrin e saj, vërtetimi se është punonjës efektiv i FNSH Dega Fier, xhupi që dyshohet se ka pasur të veshur ditën e ngjarjes etj.
Ne deklarimet si person ndaj te cilit zhvillohen hetime, shtetasi Eduart Budini, përveç pohimit plotësisht të autorësisë së vjedhjes me dhunë, paraqet si motiv për kryerjen e saj qenien nën efektin e alkoolit dhe gjendjes së rënduar psikologjike për shkak të prag ndarjes nga bashkëshortja. Gjithashtu pohon se në ngjarje ka përdorur armën e shërbimit dhe se ishte penduar. Sipas tij, pas ngjarjes kishte shkuar te vendi i taksive për t’i kërkuar falje shoferit, por nuk e kishte gjetur.
