Londër, vrasja për miqësinë e gruas me një tjetër. Ai i kontrollonte “Facebook”-un dhe telefonin
Një gjykatë angleze dënoi me 10 vjet e 6 muaj burg 40-vjeçarin shqiptar Agim Isaku, i cili gushtin e vitit të kaluar kishte vrarë të shoqen nga xhelozia, teksa fëmijët ishin në gjumë. Masakrimi i 33-vjeçares Elife Beqa u pasqyrua gjatë nga mediat angleze dhe disa prej tyre dje lajmëruan për dënimin e vrasësit.
Gjithçka kishte ndodhur për xhelozi të sëmurë, pasi e shoqja kishte nisur miqësi me një tjetër mashkull dhe dyshimet për tradhti e kishin shtyrë 40-vjeçarin që t’i kontrollonte telefonin dhe “Facebook”-un, derisa erdhi dita kur e kafshoi dhe e mbyti me duar. E reja shqiptare vdiq në spital, pikërisht në ditën kur i shoqi mbushi 40 vjeç, teksa dje në sallën e gjyqit u mësua se ato ditë Elife Beqa po përgatiste një tortë për ditëlindjen e Agimit.
Pas masakrës, ai telefonoi vetë policinë, duke u thënë se “Më duket se e vrava gruan”. Sipas mediave angleze, Agim Isaku u burgos me më shumë se 10 vjet, sepse kishte vrarë gruan e tij në apartamentin e tyre, në Southall. Dënimi me 10 vjet e gjashtë muaj burg është dhënë të martën, në 1 mars. Shqiptari ishte i martuar prej 13 vitesh me shqiptaren Elife Beqa, 33 vjeçe.
Eli, siç e thërrisnin shkurt, i kishte thënë një shoqeje se po përgatiste një tortë për 40-vjetorin e të shoqit dhe kjo do të shërbente edhe si shtysë për ta qetësuar, pasi kohët e fundit Agimi ishte bërë tepër xheloz. Gjykatësit dëgjuan në sallë dëshmi dhe panë prova se si Isaku, në një tërbim të pakontrollueshëm, rrahu dhe qëlloi me thikë të shoqen deri në vdekje, teksa dy djemtë e tyre ishin duke fjetur në dhomën tjetër.
Pas vrasjes, mori në telefon policinë, duke i lajmëruar të vinin, sepse kishte vrarë gruan. Ajo u dërgua me urgjencë në spital dhe vdiq pas disa orësh, në ditën kur Agimi mbushi 40 vjeç. Martesa e tyre ishte përkeqësuar pjesërisht, pasi 33-vjeçarja me sa duket kishte nisur një miqësi me një mashkull tjetër dhe atë natë do t’ia tregonte të shoqit edhe idenë e divorcit.
Prej javësh duket se Isaku e kishte kuptuar këtë lidhje dhe i kontrollonte “Facebook”-un të shoqes, ashtu siç i kontrollonte edhe telefonin dhe i kërkonte që ta linte punën. Prokurori Tony Badenoch tha në gjyq se “Askush nuk duhet të jetojë me frikën e dhunës në familje. Zonja Elife vdiq, pas një episodi të dhunshëm, ku ajo është rrahur, kafshuar dhe mbytur për vdekje. Kur kjo ndodhi, ajo ishte në shtëpi dhe dy djemtë ishin në gjumë, në dhomën tjetër. Kur policët arritën në shtëpi ishte shumë vonë dhe ata u thanë fëmijëve se nëna e tyre kishte vdekur”.
Inspektori Louise Knipe tha se “Ky ishte një krim i tmerrshëm. Përkundër përpjekjeve të Elit për ta bërë burrin të lumtur, Agimi e vrau nga xhelozia dhe u përpoq t’ia hidhte fajin asaj për dhunën, por juria i ka parë gënjeshtrat e tij dhe e dënoi atë për vrasje. Askush nuk duhet të jetojë me frikë dhe unë do të apeloja që të gjithë ata që ndodhen pranë abuzimit në familje, të kontaktojnë policinë, pasi njoftimi në kohë mund të shpëtojë një jetë”. Shqip
