Edhe pse Kryeministri Edi Rama kishte deklaruar shpesh nëpër studio televizive se është i kënaqur nga puna e ministrave dhe nuk do të bëjë ndryshime në kabinet, sot lajmi për largimin e Canin erdhi në dukje si rrufe në qiell të pastër. Por nuk ka qenë e tillë…
Përmes një njoftimi të shkurtër për shtyp nga Kryeministria mësojnë se Arben Ahmetajt i janë besuar Financat e vendit dhe në vend të tij shkon Milva Ikonomi. Sakaq, Shkëlqim Cani pritet ti drejtohet sërish jetës parlamentare. Ai dhe Tahiri janë të vetmit ministra që nuk e kanë lënë mandatin e deputetit, që ishte një kusht nga Rama për ministrat e tij.
Por pyetja që bëjmë të gjithë sot është se pse Rama e largoi Shkëlqim Canin? Referuar burimeve të besuara, mësojmë se dy janë shkaqet kryesore: Dhënia me koncension e TVSH, për të cilën Cani besohet se nuk ka qenë dakord dhe kredia e FMN që nuk dihet nëse do të lëvrohet (vendimi pritet të merret nesër).
Projekti për dhënien me koncesion të sistemit për gjurmimin e faturave të Tatimit mbi Vlerën e Shtuar është propozuar nga Ministria e Zhvillimit Ekonomik. Dhe sot pikërisht Arben Ahmetaj zëvendëson Canin fiks në kohën kur bëhet tenderi.
Pas kompanisë nga Hong-Kongu që do të marrë këtë tender është një kompani shqiptare e quajtur MCN Sh.pk, pronari i së cilës, Endri Meksi, është gjithashtu ortak në një kompani tjetër të regjistruar në Tiranë me vëllain e Kryeministrit, Olsi Rama. Fakte këto të zbuluara nga BIRN pak kohë më parë. Mësohet se Shkëlqim Cani ka qenë kundër këtij koncensioni, dhe kjo thuhet nga këshilltarë të tij të afërt.
Sakaq një dyshim tjetër për shkarkimin e tij ose fakt që mund të ketë ndikuar është edhe kredia e FMN. Nesër pritet të mblidhet bordi dhe të vendosë për dy këstet e radhës për Shqipërinë me vlerë 53 mln euro. “Nëse kjo kredi nesër nuk alokohet (Qeveria shqiptare i ka të dhënat për këtë) është një hipotezë e fortë për shkarkimin”, thonë burimet.
