“Unë jam pjesë e një grupi politik, nuk mund të them se kam një plan individual, por po them që, në qoftë se kam mundësi dua që atë grup politik ku bëj pjesë ta shpëtoj nga funerali se për fat të keq aty po shkon”
“Klasa politike po kalbëzohet çdo ditë dhe unë jam pjesë e saj. Doktrina e Rilindjes që na solli në pushtet falimentoi”
Deputeti i PS-së, Ben Blushi, i ftuar me emisionin Wake Up në “Top Channel” shprehet se ka si synim që të shpëtojë Partinë Socialiste nga rruga që po shkon drejt funeralit. Ky ka qenë qëndrimi i tij sa u përket zhvillimeve të politikës, e sidomos brenda së majtës. Duke krahasuar personazhet e tij të librit të shumëdebatueshëm, “Kandidati”, ai e lidh me situatën që po përjetohet në Parlamentin shqiptar. “Unë jam përpjekur të shpjegoj (në libër) Shqipërinë që jetoj sot, që jetoni ju të dy dhe njerëzit që janë jashtë kësaj studioje. Çfarë jetojnë? Jetojnë një kalbëzim për fat të keq të gjërave te të cilat ata kanë besuar. Unë e thashë dhe në Parlament, dhe këtu është e vetmja pjesë ku do të flas për Parlamentin, klasa jonë politike po kalbëzohet përditë dhe unë jam pjesë e asaj. Nuk e di sesa po higjenizohem, duke shkruar apo duke folur në Parlament, por e kam të nevojshme të flas, ndoshta si shumë të tjerë që duan ta bëjnë këtë gjë, por nuk kanë mundësi. E kam përshkruar në këtë libër: Si kjo klasë politike që po humb besimin e njerëzve mund të zgjidhet apo mund të votohet edhe duke qenë politikisht e vdekur! Në fakt, ky është libri; pra sesi një qytet detyrohet të zgjedhë një kandidat edhe pse i vdekur dhe ai fiton. Pyetja është: Pse i zgjedhim ne ata që kanë vdekur politikisht?! Pse detyrohemi të shkojmë aq larg?!. Për t’iu përgjigjur pyetjes tuaj. E thashë që nuk kam arsye të kërkoj ndjesë se kam lënduar dikë. Familjarët e mi për hir të së vërtetës kur lexuan librin, gjyshja, ajo e lexoi librin ditët e para, më tha: Tani do fillojnë të merren me ne”, shprehet Blushi. Ai jep dhe një arsye se pse libri i tij ka ngjyrën e Rilindjes. “Po është e vërtetë ajo është ngjyra e Rilindjes. Por nuk ka detyrimisht lidhje me atë shkrim, për shkak se besova se Rilindja si doktrinë, nëse mund të quhet doktrinë me të cilën fituam zgjedhjet e vitit 2013-të falimentoi dhe sot është më e vërtetë se kurrë kjo, pra jo detyrimisht ajo që kam shkruar ka lidhje me këtë libër, por ndoshta gjendja ime, mënyra sesi e shoh Shqipërinë sigurisht që ka”. Por Blushi zbulon se nuk ka ndërmend vetëm që të angazhohet vetëm në plane artistike, por dhe në ato politike, duke theksuar se ka një mision për Partinë Socialiste. “Kam shumë plane artistike dhe shpresoj të kem frymëzimin e duhur për t’i mbaruar, por sigurisht që kam edhe plane politike. Unë jam pjesë e një grupi politik, nuk mund të them se kam një plan individual, por po them që, në qoftë se kam mundësi dua që atë grup politik ku bëj pjesë ta shpëtoj nga funerali se për fat të keq aty po shkon”, shtoi Blushi.
Ndërsa shton se nuk është kurioz të dijë nëse Kryeministri Edi Rama e ka lexuar librin e ri ose jo, duke shtuar se nuk ka rëndësi nëse në këtë aksion politik të tijin është vetëm ose jo. “Për mua ka rëndësi sot se çfarë mendojnë shqiptarët. Sigurisht që unë nuk i përfaqësoj të gjithë, por jam i bindur që një pjesë e madhe e shqiptarëve ndajnë të njëjtin mendim; se Shqipëria po rrokulliset në një drejtim të paditur. Pse na ikin 100 mijë veta në ditë në Gjermani. Kjo bisedë është e trishtuar, por është e vërtetë. Në qoftë se hapet ky vend, rrezik do ikin edhe 500 të tjerë, në qoftë se Merkeli del në televizor dhe thotë pranoj shqiptarë sa të doni. Po 200 mijë për lotarinë amerikane. Janë 70% e të rinjve të papunë, mbarojnë shkollën, por nuk gjejnë një punë. Rritja ekonomike më e ulët në rajon, raporti me bizneset dhe thithja e investimeve të huaja më e vogël se Maqedonia dhe Kosova. Pra pyetja është ku po shkojmë? Përveçse krizë ekonomike, të cilën ndoshta nuk e zgjidhim dot, fatkeqësia është se jemi futur edhe në një krizë të madhe morale, sepse ajo që po ndodh në Parlament nuk janë ato çfarë njerëzit donin të shihnin. Pra njerëzit mund ta pranojnë varfërinë deri në një masë, por padrejtësinë nuk e pranojnë dot, as pabarazinë. Dhe në qoftë se qeveria jep pabarazi dhe padrejtësi sigurisht që njerëzit thonë; duhet të ikim nga ky vend. Ne duhet ta frenojmë këtë gjë. Ky është plani im, në qoftë se ka ndonjë plan”, shton deputeti socialist.
