Dokumentari që trajton luftën në Kosovë, motiv për realizimin e të cilit u bë një fotografi e vetme, rrëmbeu zemrat e shikuesve në festivalin “Austin Film Festival” në Texas. Premiera botërore e “A Single Frame” u dha në kuadër të edicionit të 22-të të një prej festivaleve më të rëndësishme për skenaristët e filmit artistik dhe dokumentar, ku rrëmbeu çmimin e publikut “Heart of Film”.
Pas shfaqjes së secilit film, audienca ka votuar për atë që quhet “Hiscox Audience Awards”, që më pas ndahet në kategori, dhe në këtë formë janë përzgjedhur edhe fituesit. Duke bërë bashkë historinë e luftës në Kosovë, punën e fotoreporteres franceze Alexandra Boulat dhe procesin e kërkimit të djaloshit në fotografi,
“A Single Frame” vjen si testament i fuqisë së fotografisë dhe si dokument i një periudhe nëpër të cilën ka kaluar jo vetëm Kosova, por edhe i tërë Ballkani. Ideatori i këtij dokumentari Jeff Bowden – i cili në vitin 2007 gjatë një vizite në Dubrovnik do të shihte fotografinë e Boulat ku shihej djaloshi kosovar të cilin ai e përshkruan “me qëndrim sikur të ishte një i rritur” – mblodhi një grup njerëzish nga Kosova e Amerika për të realizuar “A Single…”. Në premierë morën pjesë edhe Dardan Selimaj e Biroll Urcan si bashkëproducentë dhe kinematografi Kushtrim Kadriu.
I pranishëm ishte edhe vetë Sadik Kadriaj, personazhi i fotos së realizuar më 1999, që inspiroi dokumentarin. Ai ishte 12 vjeç kur imazhi i tij pushtoi botën.
Bowden ka thënë se “A Single Frame” është pritur shumë mirë dhe se ka arritur që të prekë zemrat e shikuesve amerikanë.
“Fillimisht më lejo të të them se për të gjithë ne që punuam në ‘A Single Frame’, duke përfshirë Dardanin, Birollin, Mimozën, Kiqën, ishte shumë i rëndësishëm çmimi, por që pjesëmarrja e Sadikut ishte kryelajm i festivalit”, ka thënë Bowden. AFF-ja nisi më 29 tetor dhe përfundoi më datën 5 të këtij muaji, ndërsa Bowden ka thënë se tek të martën ata e kanë marrë lajmin për çmimin për dokumentarin i cili vjen nën regji të Brandon Dickersonit.
“Ne e kemi shfaqur dokumentarin para një audience të caktuar për ta testuar, por asnjëherë nuk e kishim shfaqur para një publiku të shumtë në numër. Ishte goxha stresuese. Ndjekësit e festivaleve janë kërkues. Gjatë tërë kohës po e shikoja sallën për të parë nëse njerëzit po i shikojnë orët e tyre ose mos po i zë gjumi, ose edhe më keq, të dalin jashtë. Por asnjëra prej këtyre nuk ndodhi. Ata ishin të thelluar në rrëfim”, ka thënë Bowden derisa ka treguar se pas shfaqjes së filmit audienca ka qëndruar në sallë për të bërë pyetje rreth dokumentarit.
“Na thanë se sa shumë e pëlqyen filmin, por që asnjëherë nuk e di të vërtetën derisa ata nuk votojnë. Ai është testi real. Ne ishim shumë të emocionuar që vetëm u pranuam në festival. E fakti që fituam ishte një tjetër lloj gëzimi”, ka shtuar ai. Bowden ka treguar se si “A Single…” ka arritur që të ndryshojë perceptimin rreth refugjatëve të paktën për një person.
“Mund të them se pas shfaqjes së dokumentarit një grua mbajti dorën lart. Iu deshën disa momente që ta merrte veten. Ajo kishte qarë. ‘Kur i shoh fotografitë e refugjatëve dhe civilëve të luftës në lajme zakonisht e largoj shikimin. Pasi që e pashë këtë film, kurrë më nuk do ta largoj shikimin’,ka thënë ajo”, ka kujtuar Bowden, i cili shpreson që të ketë rastin që filmin ta shfaqë edhe në Kosovë.
“Dua që të gjithë ju ta shihni dhe ta pëlqeni atë”, ka thënë ai.
Bowden në vitin 2010 do ta merrte dhuratë fotografinë ku shihej asokohe djaloshi kosovar Sadik Kadriu.
Dhuratën ia bëri e bija e tij. Në vitin 2013 do të nisej në kërkim të personazhit të fotografisë së fotoreporteres së luftës Alexandra Boulat. Dokumentari trajton fuqinë e fotografisë, shpalos luftën përmes syrit të qelqtë dhe vjen si dedikim për fotografen e njohur Boulat, e cila nuk jeton më. Ajo ishte fotografe franceze e lindur në Paris, e cila më 2001 bashkëthemeloi “VII Photo Agency”, një agjenci ndërkombëtare e cila sot përfaqëson 19 fotografë, të cilët kanë mbuluar ngjarje të rëndësishme globale që nga vitet ‘70.
Fotografitë e kësaj fotografeje- fituese e çmimeve të shumta, përfshirë edhe “World Press Photo Awaed”-janë publikuar në shumë revista dhe gazeta, përfshirë “Times”, “Newsweek”, “Paris Match” dhe “National Geographic”. “A Single Frame” edhe pse ka në fokus luftën e fundit në Kosovë, trajton edhe një pjesë të historisë së Ballkanit.
