Deputeti Eduart Ndoçaj, deklaroi se ka shpenzuar rreth gjysmë miliardi në fushatën elektorale të vitit 2013-n për Partinë Socialiste.
Në një intervistë gjatë emisionit “Opinion”, Ndoçaj thotë se ftesën e ka marrë nga kryeministri Edi Rama, në atë kohë kryetar i opozitës. Duke folur për jetën e tij, Ndoçaj tha se ka emigruar për herë të parë në vitin 1996 në Itali si emigrant dhe filloi punë në ndërtim. Më pas ai tha se ndërtoi biznesin e tij.
Ndoçaj ishte i gjashti në listë në Qarkun e Lezhës në zgjedhjet e vitit 2013. Edhe pse nuk fitoi në atë garë, ai pritet të zërë vendin e ish-deputetit socialist të Lezhës, Arben Ndoka, pas dorëheqjes që ky i fundit bëri nga mandati i tij.
Pjesë nga intervista në “Opinion”:
Ku e morët vesh lajmin?
Ishim në një kantier dhe një mik më telefonoi për vendimin e KQZ-së.
Përse e latë ritmin në Milano dhe vendosët të ktheheshit në Shqipëri? Si ju lindi ideja për t’u bërë deputet?
U propozova në listë dhe e pranova me kënaqësi.
Si u njohët më zotin Rama?
Me zotin Rama jam takuar për herë të parë në Milano.
Ai takimi i famshëm për faturën 78 mijë eurosh?
Ishte i dyti. Takimi ishte i jashtëzakonshëm se erdhën mbi një mijë shqiptar në atë hotel për të takuar liderin e opozitës.
E besuat zotin Rama për atë që tha?
Po, pavarësisht se shumë pika nuk u realizuan.
Patët takime të tjera?
Po, patëm dhe tre takime të tjera. Më vonë mora vesh që isha në listë.
Pra, nuk e kërkuat ju?
Jo.
Sa para shpenzuat në fushatë?
E kalojnë gjysmë miliardi lekë. Nuk kisha shpresa për t’u zgjedhur se isha i gjashti në listë.
Quheni njeri i pasur?
Modest. Nuk hyj në njerëzit e pasur në Itali. Në Shqipëri po. Në Milano kam ik në moshën 19 vjeç, në qershor të vitit ’96.
Pozimi me kapele?
Ishim në një udhëtim në Meksikë.
Nga vjen ky pasion prej “kaubojsi”. Kapelën e mbani gjithmonë në kokë?
Kapen e kaubojve nga filmat. Është një aksesor i pëlqyeshëm.
Ku i blini këto?
Kjo është blerë në Republikën Dominikane.
Keni shumë kapele? Do t’i mbani në Parlament?
Nuk e di, por nëse do të bëhen objekt bisedash do t’i mbaj.
Do jetoni në Shqipëri apo në Milano? Keni banesë në Shqipëri?
Po, jetoj në fshat…
Në fshatin e Preç Zogajt?
Po.
Keni ju fuqi të ndryshoni diçka?
Do përdor të gjitha fuqitë e mia.
Nëse ju kërkoj një sugjerim publik për Ramën?
Sugjerimi sot është që të largojë fjalën burg për çdo problem që, ka Shqipëria sepse nuk mund të edukohet një popull me dhunë, por kur t’i japësh një ekonomi, një vend pune. Të mos t’i lësh mundësinë që të vidhet.
Edhe ju e keni ndjesinë që këtu vidhet?
Këtu është vjedhur komplet.
Me cilët politikanë keni miqësi?
Me të gjithë.
Keni bërë dhurata për ta?
Kanë qenë reciproke.
Kush janë njerëzit më të afërt për ju në Parlamentin e Shqipërisë, me cilin do ndani kohën?
Nuk kam emra konkret.
Cili është shqetësimi yt i parë?
Shqetësimi im është emigracioni. Ne kërkojmë më shumë mbështetje, ne kemi 25 vjet që nuk votojmë për t’u përfaqësuar. Emigrantët janë të përjashtuar totalisht.
Votimet në Shqipëri kanë shumë probleme, me LSI-në ka pasur probleme?
Në zgjedhjet e kaluara kam parë se vota e qytetarit nuk arrin ashtu siç duhet. Është kthyer në një pazar të turpshëm sepse nuk mund të blihet edhe ai pak dinjitet. Blihet vota e çdo qytetari.
Kush e blen?
Politika.
Blen dhe mazhoranca?
Në 2013-n PS nuk ka blerë asnjë vota.
Po LSI?
Kemi pas raste që ka ble vota.
Si?
Në disa mënyra.
Do përpiqeni të mos ndodhë?
Në 2015 kjo u tregua.
Pati tentativë për t’i blerë?
Po.
Nga kush?
Nga LSI-ja.
