Nga Valbona Mezani
Ka gjëra që të rriturit, qoftë prindërit apo mësuesit profesionistë, duhet të kuptojnë në lidhje me mënyrën sesi mësojnë fëmijët. Kjo do të ndihmojë, veçanërisht prindërit, të kuptojnë fëmijët e tyre dhe t’i ndihmojnë ata për t’u zhvilluar më shpejt. E rëndësishme është të mos kategorizohen apo më keq, të besohet se ka diçka që nuk shkon me fëmijën e dikujt. Ka të dhëna të mjaftueshme për të ndarë mitet nga e vërteta dhe ka rekomandime specifike për të ndihmuar, veçanërisht prindërit, për të kuptuar dhe ndihmuar fëmijët e tyre.
Së pari, të gjithë fëmijët janë të ndryshëm, kështu që krahasimi dhe përgjithësimi mund të jenë të papërshtatshme.
Fëmijët, në përgjithësi kanë një nivel vëmendjeje që nuk është i lehtë për t’u kuptuar nga të rriturit. Ky nivel varion nga pak minuta deri në jo më shumë se 12 minuta. Pra, nëse një fëmijë është jo i qetë, ndoshta është koha të marrim në konsideratë një tjetër aktivitet, që të rimarrim vëmendjen.
Bebet e zbulojnë botën nëpërmjet shqisave. Më pas, nga mosha dy vjeç e gjysmë deri nga moshën shtatëvjeçare ata i reflektojnë të gjitha aktivitetet te vetja e tyre, por edhe fillojnë të mendojnë e përpunojnë informacionet. Pas moshës 7-vjeçare, përgjithësisht fëmijët priren të largohen nga përqendrimi i gjërave vetëm rreth vetes dhe fillojnë të zbulojnë dhe testojnë botën përmes ideve të reja.
Fëmijët mund të mësojnë nëpërmjet një sërë aktivitetesh, por ata janë më të prirur për të mësuar nëpërmjet disa kategorive kryesore që përfshijnë disa aftësi bazë; si të prekurit, të bërit, të dëgjuarit, të lexuarit, të shikuarit, të vëzhguarit etj. Një fëmijë që i pëlqen të mësojë nëpërmjet të prekurit, të bërit, gjesteve dhe gjuhës së trupit, konsiderohet të ketë aftësi më të cilësuara kinetike. Nxënësi vizual është lloji i fëmijës që do të mësojë më mirë gjërat që i shikon, format, pikturat etj. Më pas kjo shndërrohet në atë që ne e pikasim tek të rriturit si kujtesë e mirë vizuale. Ka fëmijë të tjerë që mësojnë më mirë kur dëgjojnë, ose përqendrohen në ritme, tonalitete etj.
Nuk ka të drejtë apo të gabuar në mënyrën sesi fëmija mëson dhe rekomandimi është që të mos mundohemi t’i bindim ata për të ndryshuar stilin e tyre. Nga ana tjetër, vëmendja duhet të përqendrohet në një tjetër tipar të karakterit të tyre. Disa fëmijë janë të shoqërueshëm, të aftë që të mësojnë në grupe. Ka fëmijë të tjerë që janë më të qetë dhe reflektues. Kjo mund të ndryshojë me kalimin e kohës. Megjithatë, rekomandimi është të mos nxiten fëmijët për të ndryshuar karakterin e tyre, por të motivohen ata, duke pasur kujdes që të mos jemi tepër ndërhyrës dhe korrigjues. Është shumë e rëndësishme, sidomos për fëmijët reflektues, që t’iu ofrohet në mënyrë sistematike inkurajimi, në mënyrë që ata të mund të shfaqin personalitetin e tyre dhe të arrijnë të kenë besim te fëmijët e tjerë.
E fundit, por jo më pak e rëndësishme: ne dëgjojmë fëmijët tanë çdo ditë të përsëritin këngë, vjersha apo histori për të qeshur. Kjo mund të jetë një sfidë nervore për disa prindër, ndërsa për fëmijët, kjo është një mënyrë për të mësuar. Pra, kini durim dhe qëndrojuni pranë fëmijëve tuaj.
Të lënit i një fëmije vetëm me një iPad ose laptop nuk është mirë, veçanërisht nëse fëmija juaj nuk është i trajnuar mbi çfarë duhet të bëjë dhe çfarë nuk duhet të bëjë online. Qendra e trajnimit përdor një portofol trajnimi dhe certifikimi të veçantë për të ndihmuar fëmijët të qëndrojnë të sigurt online. Për më tepër, bazuar dhe në sa më sipër, një metodë e vetme nuk mjafton për të mësuar gjuhët e huaja. Në fakt, një seri aktivitetesh të kombinuara përdoren për t’u siguruar që fëmijët të argëtohen duke mësuar. Frymëzuar nga modeli arsimor britanik, çdo të shtunë Qendra ‘Kinemaja dhe Teatri Britanik’ përfshin fëmijët e moshave 5-11 vjeç në aktivitete të tilla, si të luajnë role, tregime të shkurtra, muzikë, lojëra, debat, poezi, filma, intervista. Qendra ka në plan të mundësojë frekuentimin e klubeve verore për fëmijë, bazuar në aktivitetet e mësipërme, kombinuar me sporte në natyrë dhe ngjarje artistike.
***Drejtore Ekzekutive pranë CROWN Training Centre
