Regjisori Roland Sejko sjell në ekranin e kinemasë filmin “Pritja”. Vizita e Papa Françeskut është simbolika e kthimit të lirisë fetare në Shqipëri pas 50 vjetëve pritjeje, aq sa duket se zgjat kjo vizitë në kuptimin metaforik.
Rrugëtimi i Atit të Shenjtë përmes Bulevardit “Dëshmorët e Kombit”, me portretet e martirëve që e mbrojtën besimin në Zot me jetën e tyre, i ngjante një rrugëtimi të gjatë në kohë, që zinte fill me përndjekjet që iu bënë misionarëve, klerikëve, besimtarëve, në emër të një regjimi që donte të çrrënjoste besimin.
Mbi këtë kujtesë vuajtjeje, regjisori Roland Sejko ka realizuar prodhimin e tij më të fundit kinematografik, një film dokumentar të titulluar “Pritja”, premiera e të cilit u shfaq ditën e djeshme në kinema “Millenium”, ku të pranishëm ishin edhe kryeministri Edi Rama e ministrja e Kulturës, Mirela Kumbaro.
Vizita e Papës është simbolika e kthimit të lirisë fetare në Shqipëri pas 50 vjetëve pritjeje, aq sa duket se zgjat kjo vizitë në kuptimin metaforik.
Filmi përpiqet të afrojë dy kohë: Pritjen zyrtare të një shteti laik në vigjilje të ardhjes së Papa Françeskut në Shqipëri në kohë reale dhe kthimin pas në kohën e diktaturës, në kohën e ndalimit të fesë dhe ushtrimit të së drejtës fetare në Shqipëri.
Këndvështrimi artistik i filmit vjen si një rrëfim metaforik qiellor dhe ngjiz memorien mes persekutimit, fillimit të proceseve kundër autoriteteve fetare, kohës së komunizmit kur ndodh shndërrimi i Katedrales së Shkodrës në stadiumin e lojërave me dorë.
Roland Sejko, i cili ka shkruar edhe skenarin e filmit, është mbështetur në materiale arkivore dhe historike, ndërsa rrugëtimi i Papa Françeskut nga Roma në Tiranë dhe kthimi sërish në Romë, shoqërohet me momente drithëruese, të shkëputura nga libri i At Zef Pllumit “Rrno për me tregue”.
Autori ka zgjedhur që narracionin e filmit ta ketë të gjithin në dialektin gegë, nën zërat e Zef Paçit dhe Gjovalin Çunit, drejtor i Bibliotekës së Shkodrës.
Në një rrëfim të ndjerë, më 21 shtator të vitit 2014, Martirët e Kishës Katolike janë memoria pritëse e Shqipërisë. Pas vizitës, më vonë Papa Françesku e pagëzoi Shqipërinë si “Toka e martirëve”. “Paqja e harmonia ndërfetare që kemi arritur në Shqipëri është fryt i flijimit të themeluar mbi fenë dhe njëkohësisht dëshmi e fuqishme e dashurisë që të bën për vete”, – është shprehur Imzot Rrok Mirdita. Në film nuk mungojnë edhe fjalët e Papa Françeskut: “Çfarë mizorie mund të shkaktojë mohimi i lirisë së ndërgjegjes e i lirisë fetare dhe si, nga të tilla plagë, natyra njerëzore varfërohet gjer në palcë, sepse i mungon shpresa dhe pikësynimet ideale”.
Filmi artistik “Pritja”, me regji të Roland Sejkos, është shpallur një ndër filmat fitues të projekteve të Qendrës Kombëtare të Kinematografisë në Tiranë dhe është prodhuar nga ‘Digitalb’ në bashkëpunim me Instituto Luce Cinecita.
Roland Sejko është bërë i njohur me filmin “Anija”, një film që është vlerësuar me një sërë çmimesh ndërkombëtare.
Premiera e filmit “Pritja” zgjati një orë, po aq sa edhe udhëtimi i Atit të Shenjtë nga Roma në Tiranë, një rrugë e shtruar me sakrifica martirësh…
