Një shqiptar theri të shoqen, sepse ajo nuk i kishte dhënë 100 euro për të luajtur poker. Mediat italiane njoftojnë se një grindje shpërtheu në Padova mes çiftit dhe degjeneroi në dhunë kur Qemal Jakupit i janë mohuar 100 euro nga gruaja e tij, e cila kishte frikë se ai do t’i luante në poker. Ajo që u tregoi hetuesve rrethanat e ngjarjes ishte e njëjta grua, e cila u sulmua dhe u plagos nga goditjet me thikë të burrit të saj. Ngjarja ka ndodhur ditën e enjte, rreth orës 20.00 në zonën Cavan të Padovas. Gruaja është dëgjuar nga policia në spitalin e Padovës ku ajo ka rindërtuar momentet e frikës. Ajo që i shpëtoi jetën ishte ndërhyrja e fëmijës së parë, pastaj gjatë sherrit ndërhyri një nip dhe një fqinj, të cilët u përpoqën të ndalonin shqiptarin në përpjekjen për ta qëlluar gruan edhe jashtë shtëpisë. Gjithsej, ajo ka marrë shtatë plagë nga goditjet me thikë, ku njëra prej tyre e ka prekur në mushkëri. Qemal Jakupi, 50 vjeç, me kombësi shqiptare, u bllokua nga policia me akuzën për tentativë vrasjeje dhe dje në mëngjes, gjyqtarja Roberta Marchiori ka vërtetuar arrestimin dhe lëshoi një urdhër-arrestin, i cili e dërgoi në burg. Jakupi është ende i hutuar dhe nuk mban mend se çfarë kishte ndodhur. Sipas dëshmive të mbledhura nga hetuesit, atë natë kishte pirë alkool. Për t’i ardhur në ndihmë nënës, ishte djali 18-vjeçar, i cili u plagos në dorë, në përpjekje për të marrë thikën e kuzhinës, me të cilën babai i tij po kërcënonte gruan. Episodi i dhunës vazhdoi jashtë shtëpisë, ku viktima është shpëtuar më vonë nga një ambulancë dhe është dërguar në spital. Qemal Jakupi ka tentuar të arratisej dhe u arrestua nga policia. Në zonën Cavan të Padovas, Jakupi ishte i punësuar si punëtor ndërtimi dhe banonte me familjen e tij prej 4 vitesh. Për shkak të krizës, kishte qenë i papunë dhe punonte herë pas here. Nga dëshmitë që dhanë familjarët e tij në polici u mësua se Qemali luante herë pas here poker. Për shkakun e plagosjes së gruas, policia thotë se ajo kishte bërë sherr me Qemalin, pasi ai i kërkonte 100 euro dhe ajo ishte e sigurt që do t’i luante në kumar.
