Grabitësit e Union Bank kanë përlarë plot tre milionë euro nga paratë e kësaj banke private shqiptare, duke shënuar shumën më të madhe në historinë e vjedhjeve të institucioneve bankare në Shqipëri.
Burime nga hetimi bënë të ditur sot se shuma prej tre milionë eurosh është grabitur tek Union Bank, ndërsa vetë banka nuk dha zyrtarisht asnjë shifër. Ne kërkuam një prononcim pranë zyrtarëve të kësaj banke, por ata preferuan heshtjen.
Mësohet se në thasët me para që u vodhën tek makina e blinduar që bënte transpritin e parave, janë marrë shumat e mëdha në valutë, si euro, dollarë, paund britanikë, franga zvicerane, etj.
Në 4 thasët e grabitur, sipas burimeve nga Prokuroria në Tiranë, ndodheshin 900 mijë franga zvicerane, 800 mijë dollarë amerikanë, 600 mijë pandë britanikë dhe 400 mijë euro.
Të gjitha këto para, do të transportoheshin drejt aeroportit të Rinasit dhe më pas drejt një banke në Austri.
Hetuesit ende nuk kanë saktësuar se ligjërisht sa është shuma që i lejohet bankave të nxjerrin jashtë Shqipërisë, e cila është edhe një nga pistat hetimore të prokurorisë, raporton sot Tv informativ ABC News. Ata citojnë burime nga prokuroria të shprehen se janë ngritur dyshime se punonjësit e kësaj banke, kanë bashkëpunuar me grabitësit, pasi dera nga ku mendohet se kanë hyrë tre personat e maskuar ishte lënë hapur.
Kjo derë nuk ishte e dëmtuar dhe korridoret e shkallës së pallatit nuk ishin të monitoruara nga kamerat e sigurisë, çka i ka krijuar lehtësira grabitësve.
Sipas hetimit, efektivët e kompanisë së ruajtjes fizike, janë treguar neglizhentë në kryerjen e detyrës, duke mos zbatuar asnjë nga rregullat dhe masat për shoqërimin e parave.
Hetuesit thanë se vetëm një kamerë sigurie i ka fiksuar tre grabitësit kur janë afruar pranë shkallës, por pa arritur të identifikohen fytyrat e tyre.
Policia dyshon se grabitësit, kishin dijeni për lëvizjen e parave që do të bëheshin, vendim ky që ishin të informuar vetëm një grup i vogël personash.
Për këtë fakt, ata kanë arrestuar edhe shefin e sigurisë së bankës Qirjako Taçe dhe shoqëruesin i vlerave monetare të bankës, Robert Felaj si persona të dyshuar, pasi kishin dijeni për lëvizjen e parave.
Gjithashtu, prokuroria thotë se dy të arrestuarit nuk kanë marr masa për kontrollin e ambienteve të garazhit ku janë fshehur tre grabitësit, nuk kanë siguruar derën nga kanë hyrë grabitësit si dhe nuk kanë shtuar numrin e efektivëve për shoqërimin e kësaj shume të konsiderueshme parash.
