Ministria e Kulturës ka ndarë sot çmimet kombëtare letrare të “Veprës më të mirë letrare për vitin 2013” dhe “Veprës më të mirë letrare të përkthyer për vitin 2013”.
Çmimi për veprën më të mirë letrare për vitin 2013 e mori Thanas Medi me veprën e tij “Fjala e fundit e Sokrat Bubës”. Vlera e çmimit ishte 500 mijë lekë.
Thanas Medi në fjalën e tij u shpreh se: “Jam përpjekur që me veprën time të sjell diçka të veçantë që lexuesit ta njohin dhe ta pëlqejnë atë dhe jam shumë i gëzuar që nderohem me një çmim të tillë. Gjithashtu shpreh falënderimet për jurinë, ministrinë dhe lexuesit që më kanë vlerësuar ”.
Ndërsa çmimi për përkthimin më të mirë letrarë për vitin 2013 e mori vepra “Orlandi i Çmendur” i Guljem Dedës i cili i ka kushtuar plot 17 vjet kësaj vepre. Çmimi i kësaj vepre me vlerën 300 mijë lekë iu dorëzua shtëpisë botuese “8 Nëntori”, për arsye se autori i saj ka ndërruar jetë në vitin 1994.
Ministrja e Kulturës, Mirela Kumbaro, ka theksuar në fjalën e saj përshëndetëse se Ministria i ka dhënë rendësi këtij evenimenti sepse letërsia ka nevojë të nxitet, krijimtaria ka nevojë të mbështetet dhe krijuesit duhen falënderuar dhe nderuar nga ne të gjithë.
Juria që përzgjodhi veprat ishte e përbërë nga Brikena Çabej, Saverina Pasho, Rita Petro, Ridvan Dibra, Ben Andoni, emra të njohur të botës akademike, të botimeve, të gazetarisë dhe të botës së përkthimit, e ka nisur procesin e shqyrtimit të veprave që në fillim të muajit qershor të vitit 2014. Janë afro 450 vepra në prozë dhe poezi si dhe vepra të përkthyera në prozë dhe poezi të vitit 2013 të shqyrtuara nga juria.
