Edhe festimet për fundin e diktaturës do të kremtohen të ndara për shqiptarët.
Nesër shënohet 24-vjetori i Lëvizjes Studentore ’90. prej pak vitesh, 8 dhjetori është shpallur festë kombëtare dhe është ditë pushimi në Shqipëri.
Për kremtimet e këtij përvjetori të protestave paqësore kundër sistemit komunist, planifikohen dy aktivitete.
I pari, nga protagonistët e atyre ngjarjeve, ku pritet të jetë kryeministri Edi Rama.
Ndërsa i dyti nga të rinjtë e Partisë Demokratike.
Të përbashkët kanë vetëm Qytetin Studenti, si vend-organizimi.
Te Kinoteatri, nesër në orën 11:00 zhvillohet një forum me përfaqësues të lëvizjes studentore.
Ndërkaq pasdite, të rinjtë demokratë organizojnë një koncert-protestë te sheshi “Demokracia”.
8 Dhjetori, Dita Kombëtare e Rinisë
Dita Kombëtare e Rinisë, u caktua si e tillë Kuvendi i Shqipërisë, në 8 dhjetor të vitit 2009, për të kujtuar lëvizjen e studentëve në dhjetorit e vitin 1990, e cila ishte pikënisja e rrëzimit të regjimit komunist. Në 19 vjetorin e kësaj lëvizjeje, ish kryeministri-Berisha do ta cilësonte atë si promotorin e të gjitha ndryshimeve demokratike që ndodhën në Shqipëri, fill pas atyre viteve, duke e quajtur ngjarjen edhe si “ rënien e Murit të Berlinit”, për Shqipërinë. Prej vitit 2009, kjo datë përkujtohet kombëtarisht në nder të të gjithë studentëve të dhjetorit ’90 dhe gjithë rinisë shqiptare.
“8 dhjetori është për mbarë shqiptarët dita e së ardhmes, dita e madhe e besimit tek e ardhmja që meritojmë. Historia ka provuar se liria dhe e ardhmja janë një e të pandara. Pa liri nuk mund të ketë të ardhme. Askush nuk do mund të zbehë dritën e lirisë që lindi në rrugët e sheshet e Tiranës më 8 dhjetor ’90”, ishte shprehur Kryeministri Berisha, në sheshin “Skënderbej”, ditën që u caktua Festa Kombëtare.
Më 8 dhjetor 1990, një grup studentësh e pedagogësh të Universiteteve të Tiranës, banorë të Qytetit Studenti, u bënë iniciatorë e protagonistë të kthesës së madhe historike: protestave paqësore që sollën rënien e komunizmit dhe lindjen e demokracisë. Akti i tyre publik i dha fund në mënyrë paqësore epokës të gjatë të vetëizolimit dhe të sundimit ideologjik, duke i hapur kështu rrugën e ekonomisë së tregut dhe shoqërisë së lirë.
Studentët protestues të dhjetorit ’90 kishin aspirata dhe ideale të larta kombëtare. Me shprehjen “E duam Shqipërinë si gjithë Europa”, ata kërkuan ngritjen e sistemit të vlerave perëndimore, integrimin në Evropë dhe garantimin e pluralizmit politik si bazë kryesore për një shoqëri të lirë e demokratike.
Me lëvizjen dhe idetë e saj u bashkuan pedagogë, akademikë, intelektualë qytetarë të Tiranës dhe të qyteteve të tjera kryesore duke e shndërruar Lëvizjen Studentore në një revolucion kombëtar
