Ministri i Jashtëm, Ditmir Bushati, mori pjesë në takimin e 21-të të Këshillit të Ministrave të shteteve pjesëmarrëse të OSBE-së, i cili u zhvillua në Bazel të Zvicrës. Në fjalën e tij në Ministerial ministri Bushati u ndal në rolin që duhet te luajë OSBE-ja në respektimin dhe nxitjen e të drejtave të bashkëkombësve tanë në rajon si dhe në afrimin e Kosovës me organizatën. Ai u shpreh se, “Ne besojmë fuqimisht se Kosova duhet të ketë vendin e saj në OSBE, si pjesë e rëndësishme e përfaqësimit të saj në organizmat rajonal dhe ndërkombëtar, pasi kjo do të rriste efikasitetin e vet Misionit të OSBE-së në Kosovë”. Gjatë Ministerialit u evidentua roli që OSBE-ja dhe institucionet e saj të monitorimit duhet të luajnë në Evropë në respektimin, konsolidimin e të drejtave të barabarta të të gjithë shtetasve pavarësisht vendit ku jetojnë si garanci e sigurisë së përbashkët. Ministri Bushati gjatë qëndrimit në Bazel, do të zhvillojë edhe takime dypalëshe me homologë të vendeve pjesëmarrëse në Ministerialin e OSBE-së me qëllim trajtimin e disa çështjeve me interes të ndërsjellë. Në fokus të këtij Ministerali janë kryesisht zhvillimet më të fundit në Ukrainë, rolit i OSBE-së në çtensionimin e gjendjes atje si dhe situata e sigurisë në Evropë.
