Shqipëria ka bërë disa hapa para në luftën kundër korrupsionit krahasuar me vitin 2013, por që për fat të keq ky fenomen mbetet ende në nivele të larta. Raporti i “Transparency International”, për vitin 2014 e rendit vendit tonë gjashtë pozicione më lart krahasuar me raportin e një viti më parë, ku mes 175 vendeve, Shqipëria pozicionohet në vendin e 110. Duke iu referuar raportit të vitit të kaluar, i cili e evidentonte vendin tonë si një vend ku korrupsioni ishte më i lartë në sektorin publik, veçanërisht në sektorë të tillë si partitë politike, policia dhe sistemi gjyqësor, sektori publik mbetet sërish një shqetësim për vitin 2014, por që në krahasim me një vit më parë, Shqipëria ka bërë një progres në disa shqetësime, siç ishte kapja e shtetit, që sipas raportit të 2013-s pengonte çdo përpjekje të luftës kundër korrupsionit. Ekspertët e këtij raporti kanë vendosur si indikator të rëndësishëm për matjen e korrupsionit disa elemente, siç është dominimi i ryshfetit në sektorin publik, mungesa e ndëshkueshmërisë për rastet e korrupsionit dhe përgjigjja që u jepet nevojave publike nga institucionet shtetërore. Por, sipas raportit të 2013-s, ai e justifikonte Shqipërinë, pasi të gjitha vendet e botës u përballën me rrezikun e korrupsionit në çdo nivel qeverisjeje, që nga lëshimi i licencave e deri në zbatimin e efektit të ligjeve, pika këto që nuk janë përmendur në raportin për 2014. Teksa vitin e kaluar, “Transparency International” ka tërhequr vëmendjen dhe ka apeluar se në Shqipëri korrupsioni po shfaqej me një fizionomi të re që kishte gjetur një shtrat politik favorizues, për këtë vit TIA apelon për rritjen e përgjegjshmërisë së administratës publike, pavarësinë e institucioneve dhe hetimin e pakompromis të përgjegjësve të akteve korruptive. “Transparency International” u bën thirrje vendeve në krye të indeksit, ku korrupsioni në sektorin publik është i limituar, të ndalojnë favorizimin e tij duke bërë më shumë për të parandaluar pastrimin e parave dhe për të ndaluar kompanitë të fshehin korrupsionin. Ndërkohë që vendi ynë mbetet për të marrë shembull nga ato vende ku rezultatet e tyre përmirësohen si rezultat i qeverisjes së hapur, përmes së cilës qytetarët mund të kontrollojnë liderët e tyre, ndërsa një rezultat i dobët është tregues i dominimit të ryshfetit, mungesës së ndëshkueshmërisë për korrupsion dhe institucioneve publike që nuk u përgjigjen nevojave të qytetarëve. Ndërkohë që për vitin që lamë pas, karakteristikat e korrupsionit dhe ryshfetit kanë qenë pikërisht pothuajse në çdo sektorë, duke përfshirë sistemin e ri të pastrimit të parave, financimin e partive dhe fushatave nga para të pista dhe biznese të paligjshme, kapjen e shtetit nëpërmjet kontrollit të sistemit prokurimeve dhe privatizimeve, aksesin shtetëror në trafiqet e lëndëve narkotike dhe qenieve njerëzore, monopolet ekonomike në sektorët strategjikë të ekonomisë, paprekshmërinë dhe imunitetin e krijuar të zyrtarëve të lartë ndaj ligjit e sistemit të drejtësisë, si dhe moszbatimin e ligjit dhe mungesave të kulturës së ndëshkueshmërisë. Sipas raportit të këtij viti, Shqipëria renditet në të njëjtën radhë me Ekuadorin, Etiopinë dhe Malavinë, duke shënuar performancën më të dobët në rajonin e Europës Juglindore. Ndërkohë, për vitin 2013, Shqipëria përfshihej në të njëjtën vazo me Nepalin dhe Vietnamin. Indeksi global nxjerr Maqedoninë më mirë se të gjithë pjesën tjetër të rajonit, duke e spostuar në vendin e 64-t. Llogaritja e indeksit për Shqipërinë është realizuar nëpërmjet shtatë burimeve të dhënash nga institucione të pavarura si: Indeksi i Transformimit Bertelsmann (Fondacioni Bertelsmann), Njësia e Inteligjencës së Economist (Economist Intelligence Unit), Global Insight, Freedom House, Guida Ndërkombëtare e Riskut (International Country Risk Guide), Forumi Ekonomik Botëror (World Economic Forum) dhe Projekti i Drejtësisë Botërore (World Justice Project).
Renditja 2013
Shqipëria në vend të 116, me 31 pikë
– Në Shqipëri korrupsioni po shfaqej me një fizionomi të re që kishte gjetur një shtrat politik favorizues.
– Korrupsioni ishte më i lartë në sektorin publik, veçanërisht në sektorë të tillë si partitë politike, policia dhe sistemi gjyqësor
Renditja në 2014
Shqipëria në vend të 110 me 33 pikë
– Qytetarët mund të kontrollojnë liderët e tyre. Një rezultat i dobët është tregues i dominimit të ryshfetit, mungesës së ndëshkueshmërisë për korrupsion dhe institucioneve publike që nuk u përgjigjen nevojave të qytetarëve.
– Korrupsioni në sektorin publik është i limituar, të ndalohet favorizimin e tij duke bërë më shumë për të parandaluar pastrimin e parave dhe për të ndaluar kompanitë të fshehin korrupsionin.
