Ministrja e Mbrojtjes, Mimi Kodheli, ishte sot në qarkun e Lezhës dhe ndoqi nga afër punën që po bëhet nga strukturat e Forcave të Armatosura për përballimin e situatës së rënduar nga reshjet e shumta që kanë rënë gjatë pasdites dhe natës së djeshme. Trupat dhe mjetet e Forcave të Armatosura kanë punuar pa u ndalur gjatë gjithë natës për eleminimin e pasojave të shkaktuara nga reshjet dhe normalizimin e situatës së krijuar në shumë zona, si në qytetin e Lezhës, ashtu edhe në vende të tjera të këtij qarku. Aktualisht po punohet në Lezhë, në komunën Kolsh dhe kudo ku kanë nevojë banorët e kësaj zone. Ministrja Kodheli, duke folur për këtë situatë, u shpreh se, është një sistem i tërë që nuk funksionon, por ne po marrim një varg masash jo vetëm për përballimin e kësaj situate, por edhe që në të ardhmen situata të tilla të shmangen dhe të mos përsëriten. Ministrja Kodheli ka urdhëruar që nga FA të punohet 24 orë deri në normalizimin e situatës dhe nisjen e procesit mësimor në ato shkolla që janë mbyllur. Ministrja e Mbrojtjes Mimi Kodheli dhe ministri i Brendshëm Saimir Tahiri morën pjesë në mbledhjen e Shtabit të Emergjencës në prefekturën e Lezhës. Ministrja Kodheli ka theksuar se, Forcat e Armatosura dhe Ministria e Mbrojtjes kanë qenë dhe janë në mbështetje të Policisë së Shtetit, pushtetit vendor dhe emergjencave civile. Ne po gjendemi pranë qytetarëve dhe po i japin suport jo vetëm atyre, por dhe bizneseve. Ajo i ka bërë thirrje banorëve të këtij qarku që të bëhen solidarë dhe të kontribuojnë në pastrimin e zonave të prekura nga përmbytjet, ndërsa ka kërkuar nga strukturat e autorizuara dhe media që të na ndihmojnë duke njoftuar me qëllim që të jemi prezentë kudo ku ka nevojë. Ndërsa ministri i Brendshëm Tahiri theksoi se qarku i Lezhës u përball me një situatë të jashtëzakonshme, infrastuktura e emergjencës u vu në stres dhe fatkeqësisht patëm humbjen e 3 jetëve. Ministrat vijojnë të ndjekin situatën e krijuar në këtë qark. Ndërkaq, Forcat e Armatosura kanë ndërhyrë dhe kanë ndihmuar për përballimin e pasojave të reshjeve edhe në qytetin e Tiranës, ndërsa kanë bërë të mundur të shpëtojnë arkivën e Sigurimeve Shoqërore në Tapizë të Krujës. Operacioni i Forcave të Armatosura do të vazhdojë deri në normalizimin e plotë të situatës së krijuar nga reshjet e rëna ditët e fundit.
