Zgjerimi me 12 milje i Greqisë në detin Jon është botuar në Fletoren Zyrtare të Greqisë.
“Me botimin e tij në Fletoren Zyrtare, dekreti Presidencial për zgjerimin e Greqisë me 12 milje në detin Jon, pra deri në Kepin Tainaro në Peloponez hyri në fuqi sot”.
Kjo thuhet në njoftimin e lëshuar së fundmi nga Ministria Greke e Punëve të Jashtme, në të cilën gjithashtu theksohet se: “Dekreti Presidencial u lëshua në zbatim të ligjit ratifikues të Konventës së Kombeve të Bashkuara 1982 mbi Ligjin e Detit”.
Po ashtu Greqia shprehet se zgjerimi i vijës së saj bregdetare është një e drejtë e patjetërsueshme e vendit, e cila rrjedh nga Konventa për Ligjin e Detit.
“Është një hap i domosdoshëm për procesin e zgjerimit të zonës bregdetare të vendit në zonën e mësipërme, veprim i cili, sipas Konventës, është një e drejtë e patjetërsueshme e vendit.
Dekreti Presidencial tregon se Greqia rezervon të drejtën për të ushtruar të drejtat e saj përkatëse në rajonet e tjera të territorit të saj, pasi ato rrjedhin nga Konventa për Ligjin e Detit, e cila pasqyron të drejtën zakonore ndërkombëtare.
Greqia, e vendosur në mënyrë rigoroze për mbrojtjen e së drejtës ndërkombëtare, përfshirë ligjin e detit, gjithmonë vepron në përputhje me ligjin ndërkombëtar”, përfundon deklarata.
