Axhenda e Bashkimit Evropian për pesë vitet e ardhshme nuk planifikon asnjë zgjerim me vende të reja. Lajmi është konfrmuar sot nga ministri i Jashtëm i Shqipërisë, Ditmir Bushati, i cili bëri publike disa detaje të reja mbi Samitin e Berlinit dhe Samitin e NATO-s të zhvilluara pak ditë më parë në Gjermani dhe Uells.
Ministri Bushati ishte thirrur sot në Komisionin Parlamentar të Politikës së Jashtme për të folur mbi zhvillimet e këtyre dy samiteve të rëndësishme jo vetëm për Shqipërinë por për gjithë Rajonin e Ballkanit Perëndimor.
Duke u ndalur pak tek raporti ekonomik mes vendeve të BE-së dhe atyre të rajonit ministri tha se hendeku ekonomik midis tyre është i madh, dhe gjatë samitit të Berlinit u kërkua të ndryshohet ky raport. Sipas ministrit BE ka dhënë ndihmë deri më sot, por jo të mjaftueshme, në këtë drejtim ai bëri të ditur se aktualisht vendet evropiane përfitojnë 5 deri në 6 herë më shumë fonde se sa vendet e rajonit.
Ndërsa u ndal edhe në zhvillimet e Samitit të NATO-s ministri Bushati tha se në këtë takim u fol për politikën e zgjerimit apo dyerve të hapura, ku 4 shtete janë marrë në shqyrtim: Mal i Zi, Maqedonia, Bosnje-Hercegovina dhe Gjeorgjia. Ndërsa lidhur me konkluzionet e Samitit sa i përket Kosovës, edhe pse nuk është anëtare e NATO-s dhe 4 vende të saj nuk e kanë njohur ende, Bushati tha se në samit u kërkua mbështetje e NATO-s për Kosovën në të gjitha hapat që po ndërmerr në fushën e sigurisë dhe luftën kundër terrorizmit.
