Kryetari i Komunës së Strugës, Ziadin Sela i ka dhënë një intervistë ‘Portalb’, ku ka folur për një lëvizje të re brenda-partiake në PDSH, për të cilën thotë se ka jehonë, duke treguar suksesin e saj. Mes tjerash ai thotë që nuk do të jetë si lideri aktual Menduh Thaçi, i cili ka hall vetëm interesat e tij personale ndërsa i pengon suksesi i Selës. Ai thotë se BDI qëndron ende më keq në nivelin e demokracisë brenda-partiake.
“Demokratizimi i subjekteve politike në Maqedoni, natyrisht qe lë shumë për të dëshiruar. Por, nisja e një procesi të tille për reformim nga ana e strukturave të PDSH-së në Strugë, në mënyrë unanime nga e gjithë struktura e saj tregon se ka edhe vullnet dhe vetëdije, por edhe kapacitete qe ndryshimi te ndodh. Ky proces sapo ka filluar dhe pritjet tona janë se do te përkrahet masovikisht nga shumë degë në nivel shteti… Ideja nuk është vetëm për reformim brenda PDSH-së, ky do të jetë një proces paralel i cili bashkë me reformën do te shtojë radhët e njerëzve të cilët do ta përkrahin dhe do ta mbështesin platformën politike te PDSH-se. Debati për PDSH-në është debati kryesor që mbizotëron në hapësirën mediale. BDI e vetëdijshme për këtë vrapoi të zë hapësirën mediale duke thirrur edhe kongres te partisë. Jam i mendimit që jehona e kësaj lëvizje brenda PDSH-së do të jetë shumë e madhe. Ka për të marrë hov ç’do ditë e më tepër brenda strukturave të PDSH-së dhe njëkohësisht do të shfrytëzohet kjo situate për të fituar përkrahjen e qytetarëve. Është koha t’i jepet fund logjikës së vjetër të funksionimit. I gjithë ky debat natyrisht se ka ndikim edhe tek struktura e BDI-se, ku situata është akoma më alarmante sa i përket demokratizimit te brendshëm”, ka thënë mes tjerash për Portalb Sela.
Tutje, Sela ka theksuar, – “Menduh Thaçi nuk ka pasur asnjë shkak që të ndihet i rrezikuar nga ana ime. Por, siç duket suksesi i treguar nga ana ime në zgjedhjet lokale të 2013-tës e ka bërë të ndjehet i rrezikuar atë. Nuk e kuptoj pse por në të njëjtën kohë as që e marr mundimin ta kuptoj një gjë të tillë. Thjeshtë paranoja e disa njerëzve nuk mund të mjekohet. Janë sjellje të njerëzve të cilët më të vlefshme se gjithçka kanë ruajtjen e pozicionit politik. Për ndryshim nga unë, Thaçi fatkeqësisht përfaqëson interesin e tij personal dhe aspak të partisë, anëtarëve të saj dhe aq më pak popullit”.
