Rishpërndarja e emigrantëve, BE vendos të hënën e ardhshme për azilkërkuesit shqiptarë me procedurë të përshpejtuar

Edhe pse nuk kanë rënë dakord për rishpërndarjen e 40 000 emigrantëve mes shteteve anëtare, pritet që Bashkimi Europian të vendosë të hënën e ardhshme që azilantët shqiptarë dhe të tjerët nga Ballkani perëndimor të kthehen me procedurë të përshpejtuar në vendet e origjinës.

Gjatë mbledhjes së sotme të ministrave të Brendshëm të shteteve të unionit u diskutua edhe për një listë të vendeve të sigurta të origjinës, ku me shumë gjasë janë futur edhe Shqipëria dhe Kosova. Disa prej shteteve më të fuqishme në BE, si Gjermania, Franca dhe Britania e Madhe, i kanë përpiluar këto lista, por ka dallime mes tyre se cilat shtete janë futur në to.

Sipas statistikave të Bashkimit Europian, përqindja e pranimit për shtetet e rajonit është mjaft e ulët, më pak se 1% për Maqedoninë e deri tek 7% për Shqipërinë, megjithatë kriteri për të përcaktuar një vend si të sigurt ndryshon nga shteti në shtet, çka sjell edhe papajtueshmërinë mes vendeve të unionit.

Çështja e azilantëve nga Shqipëria dhe rajoni është një problem shtesë për Bashkimin Europian, në një kohë kur mijëra refugjatë nga Lindja e Mesme dhe Afrika i drejtohen kontinentit të vjetër për t’i shpëtuar luftrave dhe varfërisë, ndërsa shtetet nuk janë të gatshme të ndajnë barrën e azilkërkuesve, pavarsisht se liderët europianë ranë dakord për një gjë të tillë në samitin e qershorit.