Ministri i Punëve të Brendshme ka thënë se Qeveria e Kosovës është dhe ka qenë e angazhuar në zgjidhjen e situatës nëpërmjet dialogut
Prishtinë 22 qershor 2014 – Ministri në largim i Punëve të Brendshme, Bajram Rexhepi, ka thënë se reagimi i Policisë së Kosovës, në raport me protestat e sotme në Mitrovicë ka qenë i shkëlqyeshëm.
“Siç edhe ka vlerësuar KFOR, Policia e Kosovës e ka kryer detyrën e vetë në mënyrë të shkëlqyeshme”, ka thënë Rexhepi.
Duke u ndërlidhur me faktin se përfaqësues të serbëve të Veriut në Mitrovicë kanë vendosur përsëri barrikada në urën e lumit Ibër, Rexhepi ka thënë se Qeveria e Kosovës është dhe ka qenë e angazhuar në zgjidhjen e situatës nëpërmjet dialogut.
“Realisht në vazhdimësi jemi në koordinim edhe me Brukselin e Washingtonin. Presim që ata të vazhdojnë të bëjnë presion në Beogradin që barrikada të hiqet. Nëse kjo nuk ndodhë, në ditët e ardhshme do ta heqim ne”, ka thënë Rexhepi për Klan Kosova.
Ai ka konfirmuar se janë 13 policë të lënduar, 9 protestues dhe janë arrestuar 10 persona, ndërsa 6 vetura janë djegur ne tërësi.
